გირჩის ლიდერი, ზურაბ ჯაფარიძე ამბობს, რომ დღეს განვითარებულ მოვლენებზე პასუხისმგებლობა საპატრიარქოს ეკისრება და ამის სათქმელად დღეს, 18:00 საათზე საპატრიარქოსთან აქცია გაიმართება. ამის შესახებ მან ვიდეომიმართვაში ისაუბრა.

"მართლმადიდებლობის საპარლამენტთაშორისო ასამბლეის ღონისძიების ერთ-ერთი მთავარი ორგანიზატორი და მასპინძელი იყო საპატრიარქო. ზოგადად, ასეთი ტიპის ინსტრუმენტები რუსეთს აქვს ძალიან ბევრი, ე.წ. რბილი ძალა... აქ მათი მთავარი დამხმარე ძალა, მეხუთე კოლონასავით, არის საპატრიარქო, არა ქართული ეკლესია, არამედ საპატრიარქო და მასში გაბატონებული პრორუსული ძალა", — თქვა ჯაფარიძემ.

მისივე განცხადებით, დღევანდელი აქციის მიზანია, საპატრიარქომ გაიგოს, რომ მოსახლეობა "ყველაფერს ხედავს, ყველაფერი იცის და არაფერი ავიწყდება".

"მათი პასუხისმგებლობაა, რაც დღეს ქვეყანაში მოხდა, რომ ჩამოვიდა ვიღაც კომუნისტი, შევიდა პარლამენტში და იქედან დაგვახურა რუსულად. მთავარი პასუხისმგებელი არის საპატრიარქო და ეს უნდა გაიგონ", — აღნიშნა ჯაფარიძემ.

დღეს, 20 ივნისს მართლმადიდებლობის საპარლამენტთაშორისო ასამბლეის წევრი და რუსი დეპუტატი, სერგეი გავრილოვი პარლამენტში, ირაკლი კობახიძის სავარძელზე დაჯდა. ეს ფაქტი გააპროტესტა ვიცე-სპიკერმა თამარ ჩუგოშვილმა და პრეზიდენტმა სალომე ზურაბიშვილმა. თავდაპირველად, უმრავლესობის წევრმა, ზაქარია ქუცნაშვილმა თქვა, რომ "სადღაც რუსს რომ დავინახავთ, არ უნდა გავნადგურდეთ", მოგვიანებით კი განმარტა, რომ "თუ საჭიროა, პოლიტიკურ პასუხისმგებლობას აიღებს".