დღეს, თბილისში, ინგოროყვას კლინიკის ბაზაზე მაღალტექნოლოგიური ამბულატორიული კლინიკა და ძვლის ტვინის ტრანსპლანტაციის ცენტრი გაიხსნა. კლინიკა ონკოჰემატოლოგიისა და ძვლის ტვინის ტრანსპლანტაციის ცენტრს, სისხლის ბანკს, სხივური თერაპიის ახალ და მაღალტექნოლოგიური დიაგნოსტიკის დეპარტამენტებს აერთიანებს. კლინიკის ბაზაზე ასევე ამოქმედდა პედიატრიული განყოფილება , ბავშვთა რეანიმაციითა და ბავშვთა ონკოჰემატოლოგიის სამსახურებით.

მთავრობის პრესსამსახურის ცნობით, გახსნის ცერემონიაზე პრემიერ მინისტრმა, გიორგი კვირიკაშვილმა აღნიშნა, რომ კლინიკისთვის აპარატურის შეძენა საყოველთაო ჯანდაცვის პროგრამის შედეგად, სტაბილური დაფინანსებიდან გამომდინარე გახდა შესაძლებელი. პრემიერის თქმით, ტრანსპლანტაციის ოპერაცია ქვეყანაში პირველად ჩატარდება. მან ასევე ისაუბრა იმ სერვისებზე, რომლითაც მომხმარებელი ისარგებლებს:

„ისრაელთან ერთად, მიმდინარეობს ექიმთა გადამზადების ერთობლივი პროგრამები და ერთობლივად ტარდება ისეთი ოპერაციები, რომლებსაც ადრე საქართველოში არ ატარებდნენ. მაგალითად შეგვიძლია ვთქვათ, რომ საქართველოში პირველად, ძვლის ტვინის ტრანსპლანტაციის ოპერაცია იწყება. ყველა შესაბამისი პირობა ამ კლინიკაში შექმნილია, რაც ძალიან მისასალმებელია, რადგან ჩვენ ხშირად გვიწევდა პაციენტების უცხოეთში გაგზავნა. ამ შემთხვევაში, ჩვენ აღარ მოგვიწევს გაგზავნა და ოპერაციები შესრულდება ქართველი მედიკოსების მიერ, მაღალი სამედიცინო ტექნოლოგიების ცენტრში."

მაღალი სამედიცინო ტექნოლოგიების ცენტრის საუნივერსიტეტო კლინიკაში, ახალი სამსახურების გახსნის შედეგად, დამატებით 110 ადამიანი დასაქმდა. საქართველოში ამ დრომდე არ არსებობდა ძვლის ტვინის ტრანპლანტაციის შესაძლებლობა და პაციენტებს ამისთვის საზღვარგარეთ უწევდათ წასვლა.