მიხეილ სააკაშვილი კიდევ ერთხელ ეხმაურება გუშინ გავრცელებულ ფარულ აუდიოჩანაწერს, რომელშიც სავარაუდოდ მისი და ნაციონალური მოძრაობის წევრების საუბარი ისმის. ჩანაწერის აუთენტურობა ჯერ დადასტურებული არაა.

სააკაშვილის თქმით, ნაციონალური მოძრაობა არჩევნების მშვიდად მოგებას აპირებს, ხოლო რევოლუციური მხოლოდ ის რეფორმები იქნება, რომლებსაც გამარჯვების შემდეგ გაატარებენ.

"რომელ არეულობაზე და გადატრიალებაზე ლაპარაკობს ეს ხალხი, ჯერ ერთი აქ სერიოზული საქმით ვართ დაკავებულები და არა რაღაც კონსპირაციებით. ჩემი ცოლი და ჩემი შვილი გავუშვი საქართველოში და კენჭს იყრის სანდრა არჩევნებზე. ჩვენ ამ არჩევნებს ვიგებთ, მშვიდად, წყნარად, აუღელვებლად, უეჭველად, ყველა გამოკითხვა ამაზე მეტყველებს.

თუკი რამე რევოლუციური უნდა მოხდეს საქართველოში, ეს იქნება არჩევნების შემდეგ. ეს იქნება რევოლუციური გამარჯვება ეკონომიკური-სოციალური მდგომარეობისა და ხალხის ცხოვრების დონის. ეს იქნება რევოლუციური სასამართლო რეფორმა, რევოლუციური გაადვილება ბიზნესისთვის საქმიანობის, ეს იქნება რევოლუციური განათლების რეფორმა, დიახ, ჩვენ რევოლუციურ რეფორმებს გავატარებთ, არჩევნებს კი მშვიდ გარემოში ჩავატარებთ და ივანიშვილი ვერაფერს ვერ არევს.

ყველაფერი მიდის მისი [ივანიშვილის] გარდაუვალი მარცხისკენ და ხელისუფლების ხავერდოვანი ჩანაცვლებისკენ და შემდგომი საქართველოს განვითარებისკენ. და ეს ასე იქნება. ერთი სული მაქვს როდის გავაგრძელებთ საქართველოს აღმშენებლობას" - განაცხადა მან ვიდეოში, რომელიც თავის ფეისბუკის გვერდზე გამოაქვეყნა.