ვიცე-პრემიერმა, მაია ცქიტიშვილმა შეაფასა ლევან ვასაძის 16 ივნისის განცხადებები და თქვა, რომ ნებისმიერი მცდელობა, ვინმემ შეითავსოს სახელმწიფოს როლი დანაშაულის ნიშნებს შეიცავს. ამის შესახებ მან დღეს, 17 ივნისის მთავრობის სხდომაზე განაცხადა.

"მნიშველოვანი იყო დღეს დილითვე ინფორმაციის გაგება, რომ არაფორმალური ორგანიზაციის ან ზოგადად იმ განცხადებების შესახებ, რაც გუშინ მოვისმინეთ, დაწყებულია საგამოძიებო პროცესი. ნებისმიერი ასეთი განცხადება, მცდელობა რომ შეითავსოს სახელმწიფოს როლი, შეიცავს დანაშაულის ნიშნებს", — განაცხადა მაია ცქიტიშვილმა.

ვასაძის მუქარა ელჩს, პოლიციასა და ლგბტ პირებს

16 ივნისს ლევან ვასაძე თავის ორგანიზებულ "ნამდვილი კაცების" აქციაზე დაემუქრა თითქმის ყველას: სამართალდამცავებს, ლგბტ პირებს, ელჩს (არ დაუკონკრეტებია რომელს), უცხოელ სტუმრებსა და არასამთავრობო ორგანიზაციებს. ბიზნესმენი ღია ტრიბუნიდან, სამართალდამცავების გარემოცვაში მხარდამჭერებს დაუმორჩილებლობისა და ძალადობისკენ მოუწოდებდა. მან აღნიშნა, რომ პოლიციას თუ არ "ეყოფა ჭკუა" და კორდონს ჩადგამს, მაშინ "სახალხო ლეგიონი" კორდონს კომბლებით შეიარაღებული გაარღვევს.

გარდა ამისა, სახალხო ლეგიონს ვასაძის თქმით, "ქამრით უნდა შეეკრა ხელები" და "ყური აეწია" ლგბტ პირებისთვის.

ვასაძე გამოსვლისას ამტკიცებდა იმასაც, რომ ლგბტ თემის წარმომადგენლის სავარაუდო მკვლელობაზე აქვს ინფორმაცია, რომელიც სურთ, მათ დააბრალონ. ის ამბობდა, რომ პრაიდისთვის ერთი პირის "მსხვერპლად შეწირვა" სურთ.

ამ განცხადებებზე შინაგან საქმეთა სამინისტრომ გამოძიება დღეს დაიწყო. შს მინისტრის მოადგილემ კი განაცხადა, რომ არ იცის ვინ არის რაინდი, მაგრამ პოლიციაზე ძალადობას შესაბამისი შედეგი მოყვება.