საქართველოში ამერიკის შეერთებულ შტატებს კომერციული წარმომადგენლობა ეყოლება და რეგიონული დატვირთვის ოფისი ექნება. ამის შესახებ ცნობილი საქართველოს პრემიერ- მინისტრის, მამუკა ბახტაძის აშშ-ში ვიზიტის დროს გახდა.

საქართველოს პრემიერ-მინისტრმა და აშშ-ის კომერციის მდივანმა ვილბურ როსმა ორმხრივი სავაჭრო ურთიერთობების გაფართოებისთვის ურთიერთგაგების მემორანდუმს მოაწერეს ხელი. მამუკა ბახტაძის თქმით, ამერიკის მხარდაჭერით საქართველოს აქვს ყველა წინაპირობა იქცეს რეგიონის ეკონომიკურ ცენტრად.

"დოკუმენტის თანახმად, ჩვენ ამერიკელი მეგობრებისგან მივიღებთ ძალიან მნიშვნელოვან მხარდაჭერას და სწორედ საქართველოში შეიქმნება ის პლატფორმა, რომელიც საშუალებას მისცემს ამერიკულ ბიზნესს უფრო ფართოდ იყოს წარმოდგენილი ჩვენს რეგიონში. როდესაც მსოფლიოს ნომერ პირველი ეკონომიკისგან გვაქვს ასეთი მხარდაჭერა, შეგვიძლია, განვაცხადოთ, რომ ჩვენ გვაქვს ყველა წინაპირობა, ვიყოთ წარმატებული იმ სტრატეგიაში, რომელიც სწორედ საქართველოს აქცევს რეგიონის ეკონომიკურ ცენტრად", — აღნიშნა მამუკა ბახტაძემ.

კომერციული წარმომადგენლობის გახსნის საკითხზე ურთიერთგაგების მემორანდუმს, ხელი საქართველოს ეკონომიკისა და მდგრადი განვითარების მინისტრმა ნათია თურნავამ და აშშ-ის კომერციის მდივანმა ვილბურ როსმა მოაწერეს.

"ჩვენ შევთანხმდით ისტორიული მნიშვნელობის დოკუმენტებსა და პრინციპებზე, რომლებიც შემდეგი წლების განმავლობაში იქნება იმის გარანტი, რომ საქართველო განვითარდება სტაბილურად, მშვიდობიან გარემოში და ჩვენი ეკონომიკური ზრდა იქნება ხელშესახები, ინკლუზიური და საქართველოს თითოეულ მოქალაქეზე აისახება", — თქვა მამუკა ბახტაძემ.

საქართველოს პრემიერ-მინისტრი მამუკა ბახტაძის სამუშაო ვიზიტი ამერიკაში დღეს, 14 ივნისს მთავრდება. პრემიერ-მინისტრმა 5-14 ივნისს ფარგლებში სხვადასხვა შეხვედრა გამართა. ის იმყოფებოდა კალიფორნიის Commonwealth club-ში საჯარო გამოსვლისას საქართველოს საინვესტიციო გარემოსა და ქვეყნის პოტენციალზე ისაუბრა. ვაშინგტონში ვიზიტის დასასრულს, მამუკა ბახტაძის სახელით საქართველოს დამოუკიდებლობის დღისადმი მიძღვნილი მიღება გაიმართება.