პატრიოტთა ალიანსის წევრი ადა მარშანია On.ge-სთან ინტერვიუში აცხადებს, რომ ქალთა მიმართ ძალადობის საკითხი, მასმედიამ წამოწია, სინამდვილეში კი საქართველო ძალადობის კუთხით, სხვა ქვეყნებისგან არ გამოირჩევა:

"ჩვეულებრივი სტატისტიკაა. ძალადობა ოჯახში - ეს არის ადამიანური ურთიერთობა, რომელიც ყოველთვის იქნება და ყოველთვის იყო. მე ვერ გეტყვით, რომ სხვა ქვეყნებთან შედარებით გამოვირჩევით ძალადობით. ყოველთვის იქნება ოჯახში კაცი, რომლის ქცევა ძალიან უცნაურად და ტრაგიკული შედეგით მთავრდება".

ადა მარშანიას თქმით, ოჯახში ძალადობის საკითხის "ხელოვნურად" გააქტიურება გარკვეულ წრეებს პრიორიტეტულად მიაჩნიათ:

"მე ვწუხვარ, რომ აქცენტები გადატანილია და იმ მიმართულებითაა გადატანილი, რაც აწყობთ ვიღაც-ვიღაცებს".

ფემიციდის სისხლის სამართლის კოდექსში ცალკე მუხლად ჩამატებასთან დაკავშირებით, პატრიოტთა ალიანსს მტკიცე პოზიცია აქვს:

"ჩემთვის ფემიციდის ცნება გაუგებარია და აქედან გამომდინარე არ დავუჭერდი მხარს. ადამიანის მკვლელობა ადამიანის მკვლელობაა, რა, იმიტომ კლავენ, რომ ქალია?".

იმის გასაგებად, თუ რა პოლიტიკა აქვთ ოჯახში ძალადობასთან, ფემიციდთან და გენდერულ კვოტირებასთან დაკავშირებით, On.ge წინასაარჩევნოდ პოლიტიკურ პარტიებს ესაუბრა. მათ მოსაზრებებს უფრო ვრცლად შეგიძლიათ გაეცნოთ ჩვენს სტატიაში.