დღეს, 27 სექტემბერს, მედიაში გავრცელებულ სატელეფონო ჩანაწერთან დაკავშირებით აშშ-ის ელჩმა იან კელიმ განცხადება გააკეთა. ელჩის განცხადების თარგმანს ტელეკომპანია რუსთავი 2 ავრცელებს.

კელის თქმით, რომელიმე პოლიტიკური ძალის ხელისუფლებაში მოსასვლელად ერთადერთი გზა არის არჩევნები, ნებისმიერი სხვა გზა არადემოკრატიული და არალეგიტიმურია:

ელჩის განცხადებით, მნიშვნელოვანია ყველას ინტერესი იქითკენ იყოს მიმართული, რომ ქართველ ხალხს მიეცეს არჩევანის გამოხატვის საშუალება, ამისთვის ერთადერთი გზა კი თავისუფალი, მშვიდი საარჩევნო გარემო და დებატებია:

"ყველამ უნდა იზრუნოს, რომ 8 ოქტომბერს იყოს მშვიდი საარჩევნო გარემო. ჩანაწერის ავთენტურობის დადასტურების შემთხვევაში, როგორი იქნება ჩვენი რეაქცია - გეტყვით, რომ არ ვაპირებ იმ თემით სპეკულირებას თუ რას ვიტყვით მომავალში. მხოლოდ ის შემიძლია ვთქვა, რომ ნებისმიერი სახის დაშინება პოლიტიკური პარტიების მხრიდან მიუღებელია".

ფარულ აუდიო ჩანაწერში, რომელიც 27 სექტემბერს გამოქვეყნდა, ისმის მიხეილ სააკაშვილისა და ერთიანი ნაციონალური მოძრაობის ლიდერების ხმა, რომლებიც თითქოს საუბრობენ საქართველოში მოვლენების რევოლუციური სცენარით განვითარებაზე. ჩანაწერში ისმის საუბარი რუსთაველის გამზირის კარვებით გავსებაზე, ივანიშვილის სახლთან აქციებზე, ასევე, მის მიმართ ფიზიკურ ანგარიშსწორებაზე, თუმცა, თავად საუბრის მონაწილეები აცხადებენ, რომ ეს საუბარი რეალური არ არის და ის სახელმწიფო უსაფრთხოების სამსახურის მიერაა დამონტაჟებული. ჩანაწერის ავთენტურობა ჯერ დადგენილი არ არის.

სახელმწიფო უსაფრთხოების სამსახურის ცნობით, მედიით გავრცელებულ ფარულ ჩანაწერებთან დაკავშირებით, სახელმწიფო უსაფრთხოების სამსახურის კონტრდაზვერვის დეპარტამენტში დაიწყო გამოძიება საქართველოს სისხლის სამართლის კოდექსის 315-ე მუხლის 1-ლი ნაწილით, რაც გულისხმობს შეთქმულებას სახელმწიფო ხელისუფლების დასამხობად ან ხელში ჩასაგდებად.