ფინანსთა სამინისტროს საგამოძიებო სამსახურის ცნობით, ჯგუფურად, ყალბი საგადასახადო დოკუმენტების დამზადება-გამოყენების საქმეზე სისხლის სამართლებრივი დევნა სამი პირის მიმართ დაიწყო.

გამოძიების ვერსიით, ბრალდებულებმა სხვადასხვა რეგიონში დაარეგისტრირეს კომპანიები, დაამზადეს და გამოიყენეს ყალბი საგადასახადო დოკუმენტები. ბრალდება აცხადებს, რომ ხდებოდა სხვადასხვა დასახელების საქონლის მიწოდება და ხელოვნურად შეიქმნეს ყალბი აქტივი დამატებული ღირებულების გადასახადში. უწყების ცნობით, ბრალდებულების მიერ ფიქტიურად შექმნილი აქტივის ოდენობა 30 მილიონ ლარს აღემატება.

გამოძიება მიმდინარეობს საქართველოს სისხლის სამართლის კოდექსის 210-ე მუხლის მეორე ნაწილით, რაც სასჯელის სახით ითვალისწინებს თავისუფლების აღკვეთას 4-დან 7 წლამდე ვადით.