ტელეწამყვანი ლევან როსტოშვილი, იგივე როსტო პატიმრობიდან გაათავისუფლეს. ამის შესახებ ინფორმაცია On.ge-ს სასჯელაღსრულების დაწესებულებაში დაუდასტურეს. მათივე ცნობით, 23 მაისს ის პირობით ვადამდე ადრე გათავისუფლდა და ამის გადაწყვეტილება, მისი ქცევიდან გამომდინარე მიიღო სპეციალურმა კომისიამ. როსტოშვილის სასჯელის მოხდის ვადა 2020 წლის 7 იანვარს სრულდებოდა.

2017 წლის მარტში ტელეწამყვან ლევან როსტოშვილს ნარკოტიკული საშუალება MDMA-ის უკანონო შენახვა-შეძენისთვის, 8-წლიანი პატიმრობა მიუსაჯეს. 2017 წლის 5 ივნისს როსტოშვილს საპროცესო შეთანხმება გაუფორმდა, რომლის საფუძველზეც მას სასჯელის ვადა შეუმცირდა და 3 წელი განესაზღვრა.

ლევან როსტოშვილი და ლაშა კურტანიძე ნარკოდანაშაულის ჩადენის ბრალდებით, თბილისში 2016 წლის 2 მაისს დააკავეს. საქმეზე გამოძიება სისხლის სამართლის კოდექსის 260-ე მუხლის მე-6 ნაწილის "ა" ქვეპუნქტით და 260-ე მუხლის მე-3 ნაწილის "ა" ქვეპუნქტით მიმდინარეობდა, რაც ნარკოტიკული საშუალების, მისი ანალოგის ან პრეკურსორის უკანონო დამზადებას, წარმოებას, შეძენას, შენახვას, გადაზიდვას, გადაგზავნას ან გასაღებას გულისხმობს.