სახელმწიფო ინსპექტორობის კანდიდატის, ლონდა თოლორაიას თქმით, ის არ ნანობს მის მიერ პროკურატურაში განვლილ არც ერთ საფეხურს. თოლორაიას ამ საკითხზე საუბარი ადამიანის უფლებათა კომიტეტის სხდომაზე დეპუტატების კითხვებზე პასუხის გაცემის დროს მოუწია.

მისი თქმით, ის პროკურატურაში სტაჟირების კონკურსით 2007 წელს მოხვდა. მან აღნიშნა, რომ ის თავდაპირველად იყო სტაჟიორ-პროკურორი, შემდეგ კი გახდა რიგითი პროკურორი.

"ვერ დამისახელებთ ვერც ერთ სისხლის სამართლის საქმეს, სადაც პროცესის მონაწილე მხარე იტყვის, რომ ლონდა თოლორაიამ რაიმე ეტაპზე მისი უფლებები დაარღვია. შესაბამისად, მე არ ვნანობ არცერთ იმ საფეხურს, რომელიც პროკურატურაში გავატარე. პირიქით, მე ვამაყოფ ჩემი გაკეთებული საქმით იმიტომ, რომ ვერასდროს ვერავინ იტყვის, რომ რომელიმე ეტაპზე მე არაკეთილსინდისიერად ან კანონის მოთხოვნების უხეში დარღვევით ვახორციელებდი ჩემს სამსახურებრივ უფლებამოსილებას", — განმარტა მან.

მისი თქმით, მან პროკურორების ზედამხედველობის საბჭოში მუშაობის დროს არაერთი დოკუმენტი გააგზავნა გენერალურ ინსპექციაში და პროკურორების გადაცდომების შესახებ აცნობდა.

"ვფიქრობ, რომ ის იერარქიული წარმატება, რომელიც მე ამ სისტემაში მქონდა იყო ერთადერთი მიზეზის დამსახურება: ის, რომ მე ყოველთვის კეთილსინდისიერად ვასრულებდი ჩემთვის დაკისრებულ მოვალეობას. მე არ ვარ პოლიტიკოსი და ამიტომ რეჟიმების შეფასებისგან თავს შევიკავებ", — განმარტა მან.

სახელმწიფო ინსპექტორის შესარჩევმა საკონკურსო კომისიამ პრემიერ-მინისტრს სულ ორი კანდიდატურა წარუდგინა. ორივე მათგანი შინაგან საქმეთა სამინისტროს მოქმედი თანამშრომელია. ლონდა თოლორაია ადამიანის უფლებათა დაცვის დეპარტამენტის დირექტორია, ხოლო ვალერი ლომუაშვილი სამინისტროს კვლევის და განვითარების დეპარტამენტის ყოფილი დირექტორი.