თბილისში სამტრედიის ქუჩაზე მდებარე ბინის პირველ ნომერში გარდაცვლილი ქალი იპოვეს. ცხედართან ერთად ბინაში კიდევ ორი ქალი იმყოფებოდა. ისინი სამედიცინო დაწესებულებაში გადაიყვანეს.

On.ge-ს ინფორმაციით, საგანგებო სიტუაციების მართვის სამსახური მეზობლებმა ბინიდან გამომავალი უსიამოვნო სუნის გამო გამოიძახეს. ადგილზე მისულ მაშველებს სახლში ახალგაზრდა ქალი დახვდათ, რომელიც იყო კონტაქტური, თუმცა კარს არ აღებდა.

საგანგებო სიტუაციების მართვის სამსახურში ადასტურებენ, რომ გამოძახებაზე მივიდნენ და კარი თავად გახსნეს, სხვა დეტალებზე კი არ საუბრობენ.

პოლიციას და მაშველებს ბინაში სამი ქალი დახვდათ, ერთი გარდაცვლილი, ერთი უგონო მდგომარეობაში, ხოლო მესამე კონტაქტური.

შინაგან საქმეთა სამინისტროში გაზით ინტოქსიკაციას გამორიცხავენ. მომხდარზე გამოძიება სისხლის სამართლის კოდექსის 115-ე მუხლით არის აღძრული, რაც თვითმკვლელობამდე მიყვანას გულისხმობს.