ხორავას ქუჩაზე მომხდარი მკვლელობის საქმის პროკურორი მირიან მეგრელიშვილი ამბობს, რომ აქვთ მტკიცებულებები, რომლებიც ადასტურებს მიხეილ კალანდიას მიერ ბასრი საგნის გამოყენებას დავით სარალიძის წინააღმდეგ. პროკურორმა არ დააკონკრეტა მეტი დეტალი და არც ის, ამოღებულია თუ არა იარაღი.

"სააპელაციო სასამართლოს გადაწყვეტილებით დადასტურდა რომ დანაშაული ჩადენილ იქნა ჯგუფურად გ ჯ ს მიერ. ეს კვალიფილაცია საფუძველი იყო იმისა რომ კალანდიას წარედგინა ბრალი", — განმარტა პროკურორმა.

საქალაქო სასამართლოს გადაწყვეტილებით მიხეილ კალანდიას პატიმრობა შეეფარდა. დაცვის მხარე გირაოს ითხოვდა, თუმცა მოსამართლემ მათი არგუმენტები არ გაიზიარა.

სხდომა დასაწყისში ღია იყო, თუმცა პროკურორმა მოითხოვა მისი დახურვა იმ მოტივით, რომ მიხეილ კალანდია ხორავას ქუჩაზე მომხდარი მკვლელობისას არასრულწლოვანი იყო. შუამდგომლობა გაიზიარა დაცვის მხარემ და თავად ბრალდებულმაც. მოსამართლის თქმით, პროცესი სრულად დაიხურება ვინაიდან საქმეში კიდევ სხვა არასრულწლოვნებიც ფიგურირებენ. მან ასევე განუმარტა ბრალდებულს რომ საქმე არასრულწლოვანთა მართლმსაჯულების კოდექსით განიხილება.

მიხეილ კალანდია დავით სარალიძის ჯგუფურად, დამამძიმებელ გარემოებაში მკვლელობის ბრალდებით დღეს, 4 ივნისს მას შემდეგ დააკავეს, რაც სააპელაციო სასამართლოს განაჩენი დადგა. ის ბრალს არ აღიარებს.