ევროპული საქართველოს ლიდერმა და ხორავას ქუჩის საქმის დროებით საპარლამენტო საგამოძიებო კომისიის თავმჯდომარე, სერგი კაპანაძე მიხეილ კალანდიას დაკავებას გამოეხმაურა და თქვა, რომ უნდა შესრულდეს მათი სხვა რეკომენდაციებიც:

"იმისათვის, რომ ამ საქმეში სამართალი ბოლომდე იყოს დაკმაყოფილებული მნიშვნელოვანია, დანარჩენი რეკომენდაციების შესრულებაც. მათ შორის, იმ ადამიანების პასუხისმგებლობაც, რომლებმაც ეს საქმე გააყალბეს. მნიშვნელოვანია, რომ ბოლომდე დადგეს შედეგი. თუ დადგინდება მათი არამართლზომიერი ქმედებები, ისინიც უნდა მიეცნენ პასუხისმგებლობაში. საგამოძიებო კომისიამ რეკომენდაცია გამოსცა შარშან. ჩვენ გვახსოვს, რომ კომისიის მუშაობის დაწყებისთანავე მალევე გამოვეცით შუალედური რეკომენდაცია, რომ მას [მიხეილ კალანდიას] უნდა წაყენებოდა ბრალი".

ხორავას ქუჩის საქმეზე მიხეილ კალანდია დავით სარალიძის ჯგუფურად, დამამძიმებელ გარემოებაში მკვლელობის ბრალდებით დააკავეს. ამის შესახებ დღეს, 4 ივნისს შინაგან საქმეთა სამინისტროში ბრიფინგი გაიმართა.

უწყების განცხადებით, პირველი ინსტანციის განაჩენის შემდეგ მათ მოიპოვეს მტკიცებულებები, რომლებიც მკვლელობაში კალანდიას თანამონაწილეობის ეჭვს ამყარებდა.

3 მაისს სააპელაციო სასამართლომ ბრალდებული გ.ჯ დამნაშავედ ცნო დავით სარალიძის ჯგუფურ მკვლელობაში დაუდგენელ პირებთან ერთად. ამ გადაწყვეტილებით მოსამართლეთა პალატამ ნაწილობრივ შეცვალა საქალაქო სასამართლოს გადაწყვეტილება და ნაწილობრივ გაიზიარა ბრალდების მხარის პოზიცია.

ხორავას ქუჩაზე ორი არასრულწლოვანი 2018 წლის პირველ დეკემბერს მოკლეს. გიორგი გახარიამ გამოძიების დაწყებიდან 4 დღის შემდეგ განაცხადა, რომ "დანაშაულში მონაწილე ყველა პირი დადგენილი და დაკავებულია".

შვილმოკლული მამა ზაზა სარალიძე ამტკიცებდა, რომ მისი შვილის მკვლელობაში დამნაშავეს შსს და პროკურატურა ხელს აფარებდა. ამ საქმეზე შექმნილი იყო პარლამენტის სპეციალური საგამოძიებო კომისია. შინაგან საქმეთა სამინისტრომ კი გამოძება გამოყოფილი საქმის ფარგლებში გააგრძელა.

გაიგე მეტი: 1 წელი ხორავას ქუჩის ტრაგედიიდან — მოკლედ