ავსტრიის პრეზიდენტმა ალექსანდრ ვან დერ ბელენმა საკონსტიტუციო სასამართლოს თავმჯდომარე, ბრიგიტე ბირლაინი ქვეყნის კანცლერად დანიშნა. ბირლაინი პირველი ქალია, რომელიც ამ პოსტს დაიკავებს.

69 წლის ბრიგიტე ბირლაინი 2019 წლის სექტემბრის ვადამდელ საპარლამენტო არჩევნებამდე გარდამავალ მთავრობას უხელმძღვანელებს. მისი წინამორბედი სებასტიან კურცი და მისი მთავრობა პარლამენტმა გადააყენა. მთავრობის გადაყენების გადაწყვეტილება ავსტრიის პარლამენტმა ე.წ. იბიცას სკანდალის შემდეგ მიიღო.

ავსტრიის სახალხო პარტიის კონსერვატი ლიდერი, სებასტიან კურცი 32 წლისაა და სახელმწიფოს ყველაზე ახალგაზრდა ლიდერად მიიჩნევა მსოფლიოში. იგი პირველი კანცლერია მეორე მსოფლიო ომის შემდეგ ავსტრიაში, რომელსაც უნდობლობა გამოუცხადეს.

კენჭისყრისას, სოციალ-დემოკრატების ინიციატივას, უნდობლობის გამოცხადებაზე, მხარი დაუჭირა კურცის ყოფილმა კოალიციურმა პარტნიორმა, ულტრა მემარჯვენე თავისუფლების პარტიამ.

"იბიცას სკანდალი"

ყველაფერი იმით დაიწყო, რომ გერმანულმა მედიამ ესპანეთის კუნძულ იბიცაზე გადაღებული ფარული ვიდეო გაავრცელა. BBC-ის ინფორმაციით, კადრები 2017 წელს ფარულად, ავსტრიის საპარლამენტო არჩევნებამდე რამდენიმე კვირით ადრეა გადაღებული. მასში თავისუფლების პარტიის ლიდერი, ვიცე კანცლერი ჰაინც-კრისტიან შტრასე ჩანს, ამავე პარტიის საპარლამენტო ჯგუფის ლიდერთან, იოჰან გუდენუსთან ერთად. BBC წერს, რომ ისინი რუსი ოლიგარქის ნათესავ ქალს შეხვდნენ, რომელსაც შტრასე სახელმწიფო კონტრაქტებს სთავაზობდა, თუ ის არჩევნებში მის პარტიას დაეხმარებოდა და ავსტრიულ გაზეთ Kronen Zeitung-ს იყიდდა.

კადრების გამოქვეყნებიდან მალევე ჰაინც-კრისტიან შტრასემ თანამდებობა დატოვა. პრეზიდენტმა ალექსანდრ დე ვანმა, სებასტიან კურცის ბრძანების საფუძველზე შს მინისტრი ჰერბერტ კიკლი დაითხოვა.