ავსტრიის პარლამენტმა კანცლერი სებასტიან კურცი და მისი მთავრობა გადააყენა. BBC-ის ცნობით, გადაწყვეტილება სპეციალურ საპარლამენტო სესიაზე დღეს, 27 მაისს მიიღეს. კენჭისყრისას, სოციალ-დემოკრატების ინიციატივას, უნდობლობის გამოცხადებაზე, მხარი დაუჭირა კურცის ყოფილმა კოალიციურმა პარტნიორმა, ულტრა მემარჯვენე თავისუფლების პარტიამ.

ახლა ავსტრიის პრეზიდენტმა უნდა გადაწყვიტოს, თუ ვინ იქნება მომდევნო კანცლერი. ახალი ლიდერი დროებით მთავრობას სექტემბერში დაგეგმილ არჩევნებამდე უხელმძღვანელებს.

ავსტრიის სახალხო პარტიის კონსერვატი ლიდერი, სებასტიან კურცი 32 წლისაა და სახელმწიფოს ყველაზე ახალგაზრდა ლიდერად მიიჩნევა მსოფლიოში. იგი პირველი კანცლერია მეორე მსოფლიო ომის შემდეგ ავსტრიაში, რომელსაც უნდობლობა გამოუცხადეს.

"იბიცას სკანდალი"

ყველაფერი იმით დაიწყო, რომ გერმანულმა მედიამ ესპანეთის კუნძულ იბიცაზე გადაღებული ფარული ვიდეო გაავრცელა. BBC-ის ინფორმაციით, კადრები 2017 წელს ფარულად, ავსტრიის საპარლამენტო არჩევნებამდე რამდენიმე კვირით ადრეა გადაღებული. მასში თავისუფლების პარტიის ლიდერი, ვიცე კანცლერი ჰაინც-კრისტიან შტრასე ჩანს, ამავე პარტიის საპარლამენტო ჯგუფის ლიდერთან, იოჰან გუდენუსთან ერთად. BBC წერს, რომ ისინი რუსი ოლიგარქის ნათესავ ქალს შეხვდნენ, რომელსაც შტრასე სახელმწიფო კონტრაქტებს სთავაზობდა, თუ ის არჩევნებში მის პარტიას დაეხმარებოდა და ავსტრიულ გაზეთ Kronen Zeitung-ს იყიდდა.

კადრების გამოქვეყნებიდან მალევე ჰაინც-კრისტიან შტრასემ თანამდებობა დატოვა. პრეზიდენტმა ალექსანდრ დე ვანმა, სებასტიან კურცის ბრძანების საფუძველზე შს მინისტრი ჰერბერტ კიკლი დაითხოვა.