საქართველოს პრეზიდენტი, სალომე ზურაბიშვილი მიიჩნევს, რომ პრეზიდენტი ჭიათურაში მიმდინარე შრომითი დავის საკითხს არ უნდა ეხებოდეს. ამის შესახებ მან Facebook-ზე მაღაროელების გაფიცვასთან დაკავშირებით დაწერა.

"ამავე დროს მიმაჩნია, რომ ხაზი უნდა გაესვას ევროპული სტანდარტის დანერგვის აუცილებლობას და პირველ რიგში, როცა ეს ეხება შრომის უსაფრთხოებას, რომელიც მაღაროებში ძალიან აქტუალურია. თანამედროვე ევროპული საქართველო თავის მოსახლეობას ისეთ სამუშაო გარემოს უნდა უქმნიდეს, რომ ადამიანის სიცოცხლე, ღირსება და ჯანმრთელობა ეფექტურად იყოს დაცული", — წერს პრეზიდენტი.

ჭიათურაში ჯორჯიან მანგანეზში დასაქმებული მაღაროელები მეშვიდე დღეა შიმშილობენ. ისინი ხელფასის მომატებასა და სამუშაო და ჯანდაცვის პირობების გაუმჯობესებას ითხოვენ.