მას შემდეგ, რაც Google-მა ჰუავეის ანდროიდის სისტემაზე წვდომა შეუზღუდა, ჩინური კომპანიის ქართულმა წარმომადგენლობამ განცხადება გაავრცელა.

"განგაშის საფუძველი არ არსებობს და ჩვენს მომხმარებლებს შიშის საფუძველი არ აქვთ", — ვკითხულობთ განცხადებაში.

მისი მიხედვით, ჰუავეი გააგრძელებს სისტემის უსაფრთხოების განახლებებს და გაყიდვების შემდგომ სერვისებს ჰუავეის ყველა იმ პროდუქტზე, რომელიც უკვე გაიყიდა ან/და წარმოადგენს გასაყიდ მარაგს.

რა მოხდა?

ახალი დიზაინის ჰუავეის სმარტფონებმა გუგლის აპლიკაციებზე წვდომა დაკარგა. ცვლილება აშშ-ის პრეზიდენტის, დონალდ ტრამპის ადმინისტრაციის გადაწყვეტილებას მოჰყვა, რომლის ფარგლებშიც ჰუავეი იმ კომპანიების სიას დაემატა, რომლებთანაც ამერიკული ფირმები ლიცენზიის გარეშე ვეღარ ითანამშრომლებენ.

ჰუავეის ამჟამინდელ მომხმარებლებს საშუალება გექნებათ განაახლოთ აპლიკაციები, გამოიყენოთ გუგლის Play სერვისები და მართოთ დაცვის პარამეტრები.

მაგრამ, 2019 წლის ბოლოს, როდესაც გუგლი ანდროიდის ახალ ვერსიას გამოუშვებს, ის ჰუავეის მოწყობილობებზე მიუწვდომელი იქნება.

შესაძლოა, რომ ჰუავეის სამომავლოდ საერთოდ აღარ ჰქონდეს ისეთი აპლიკაციები, როგორიცაა YouTube და Maps.

ჰუავეი დასავლურ ქვეყნებში კრიტიკის ქარცეცხლში გაეხვა, მას შემდეგ, რაც გავრცელდა ინფორმაცია იმაზე, რომ ტექნოლოგიას ჩინეთი შესაძლოა სადაზვერვო მიზნებით იყენებდეს. ამის საპასუხოდ კომპანიამ განაცხადა, რომ ის ჩინეთის მთავრობისგან დამოუკიდებლად მუშაობს და მისი მომხმარებლის ინფორმაციის საფრთხეს არ უქმნის.