საქართველოს ახალგაზრდა იურისტთა ასოციაციის შეფასებით, საარჩევნო უბნებთან კოორდინატორებისა და მხარდამჭერების მობილიზება ამომრჩევლის ნების თავისუფალ გამოხატვაზე, უარყოფით გავლენას ახდენს.

განცხადებაში ნათქვამია, რომ მართალია ხმის მისაცემად მოსული ამომრჩევლების დისტანციურად აღრიცხვა ან ფოტო-ვიდეო გადაღება კანონდარღვევა არ არის, მაგრამ ეს ფაქტი მოქალაქეებს კონტროლის განცდას უჩენს.

"ეს უარყოფითი ფაქტები წინა რამდენიმე არჩევნების დროს გამოვლენილი ტენდენციაა და უარყოფითად არის შეფასებული, როგორც ადგილობრივი, ისე საერთაშორისო სადამკვირვებლო მისიების მიერ. კიდევ უფრო შემაშფოთებელია მმართველი პარტიის ერთ-ერთი ლიდერის კახა კალაძის მიერ კოორდინატორების მიმართ გაკეთებული მოწოდებები", — წერია საიას განცხადებაში

ამას გარდა 14 საათის მონაცემებით საიამ შემდეგი დარღვევები გამოავლინა:

  • ფარულობის პრინციპის დარღვევა წყალტუბოში, სადაც ელექტრონული ხმის დათვლის ტესტირება მიმდინარეობს;
  • წილისყრის პროცედურების დარღვევა ზუგდიდის #73-ე და #75-ე საარჩევნო უბნებზე;
  • კენჭისყრის პროცედურის დარღვევა ზუგდიდის #10 და #32-ე უბნებზე;
  • ზუგდიდის #108-ე უბანზე საარჩევნო უბანზე არაუფლებამოსილი პირის ყოფნა;
  • მარნეულის #83-ე უბანზე განმეორებითი ხმის მიცემა.