ვალერი გელაშვილი ქრონიკის ეთერში მისი ცემის ფაქტზე სასამართლოს დღევანდელ გადაწყვეტილებას აფასებს და ამბობს, რომ ბრალდებულების მიმართ გამოტანილი სასჯელი მათი დანაშაულის ადეკვატურია.

ჟურნალისტის შეკითხვას, გელაშვილის აზრით, ამავე საქმესთან დაკავშირებით გამამტყუნებელ განაჩენს გამოიტანენ თუ არა ყოფილი პრეზიდენტის, მიხეილ სააკაშვილის მიმართ და საკმარისი მტკიცებულება აქვს თუ სახელმწიფო ბრალდებას მის მიმართ, გელაშვილმა უპასუხა:

"მთავარი დამნაშავე ამ საქმეში იყო მიხეილ სააკაშვილი, ვისი მითითებითაც მისმა სპეცსამსახურებმა ეს თავდასხმა შეასრულეს. ამიტომ ის პასუხს აგებს და მის მიმართ საკმარისი ფაქტებია, რომ მას საკადრისი სასჯელი მიუსაჯონ".

მისი თქმით, აღნიშნულ საქმეში ძირითადად სპეცდანიშნულების რაზმის წევრების, ნინო ბურჯანაძისა და ირაკლი ოქრუაშვილის ჩვენებები და იმდღევანდელი ფაქტობრივი სატელეფონო საუბრებია წარმოდგენილი:

"11 წელი [ამ საქმის გახსნას] იმიტომ დასჭირდა, რომ ნაციონალური მოძრაობა იყო ხელისუფლების სათავეში. ისინი თავის თავს არ დაადანაშაულებდნენ. ჩვენი ხელისუფლების პერიოდში ეს საქმე 1 წელიწადში გაიხსნა და პროცესი 2 წელიწადი მიდიოდა".

2005 წელს მომხდარი შეიარაღებული თავდასხმის და ცემის საქმეზე, საქართველოს ყოფილ პრეზიდენტს მიხეილ სააკაშვილს, შინაგან საქმეთა ყოფილ მინისტრს, ვანო მერაბიშვილს, სპეციალური ოპერატიული დეპარტამენტის ყოფილ უფროსს, ერეკლე კოდუასა და ამავე დეპარტამენტის სამმართველოს ყოფილ უფროსს, გია სირაძეს პარლამენტის წევრის, ვალერი გელაშვილის ცემის ფაქტზე ბრალი 2014 წელს წაუყენეს.

დღეს ამ საქმეზე სასამართლომ შინაგან საქმეთა ყოფილი მინისტრი ვანო მერაბიშვილი, სპეციალური ოპერატიული დეპარტამენტის ყოფილი ხელმძღვანელი ერეკლე კოდუა და ამავე დეპარტამენტის სამმართველოს ყოფილი უფროსი, გია სირაძე დამნაშავედ ცნო.