"ჩემთვის მთავარია, როდესაც ბატონ ვანოს მომავალი წლის თებერვალში სასჯელი დაუმთავრდება, ჩვენი სისტემიდან გავიდეს მაქსიმალურად ჯანმრთელი", — ამის შესახებ იუსტიციის მინისტრმა ტელეკომპანია იმედზე ქრონიკის ეთერში თქვა. მინისტრმა ამით ვანო მერაბიშვილის ვადაზე ადრე გათავისუფლებაზე, ე.წ. უდოს კომისიის უარყოფით დასკვნაზე დასმულ კითხვას უპასუხა.

მინისტრის განმარტებით, საბჭომ დაასკვნა, რომ როდესაც პატიმარი არც კი აღიარებს დანაშაულს და არ აღიარებს, რომ მას მრავალი დაზარალებული ჰყავს, ასეთი მსჯავრდებულისთვის პირობით ვადაზე ადრე გათავისუფლება, ნაადრევია.

თეა წულუკიანის თქმით, ვანო მერაბიშვილს შეუძლია კიდევ სცადოს და მიმართოს კომისიას. მისივე განმარტებით, მერაბიშვილს სასჯელი ისედაც იწურება და ასეთ დროს, პატიმარს ყოველთვიურად ეძლევა ამის უფლება.

24 აპრილს ცნობილი გახდა, რომ სპეციალური პენიტენციური სამსახურის ადგილობრივმა საბჭომ, ე.წ. უდოს კომისიამ ვანო მერაბიშვილს გათავისუფლებაზე უარი უთხრა.

ყოფილი შინაგან საქმეთა მინისტრი, ვანო მერაბიშვილი, რომელიც 2012 წლის საპარლამენტო არჩევნებში პარტიის დამარცხებამდე რამდენიმე თვე პრემიერ-მინისტრი იყო, 2013 წლის მაისში დააკავეს მითვისება-გაფლანგვისა და ამომრჩევლის მოსყიდვის ბრალდებით. მოგვიანებით, მას სხვა ბრალდებებიც წაუყენეს — 2011 წლის 26 მაისის აქციისა და სანდრო გირგვლიანის მკვლელობის საქმეებზე უფლებამოსილების გადამეტების მუხლებით. მერაბიშვილი 2014 წელს სასამართლომ დამნაშავედ სცნო და პატიმრობა შეუფარდა.