პარლამენტის თავმჯდომარის, ირაკლი კობახიძის განცხადებით, საქართველოში რუსული გავლენა მცირდება და ეს ხელისუფლების ერთ-ერთი დამსახურებაა. ამის შესახებ კობახიძემ უკვდავთა პოლკის აქციაზე საბჭოთა სიმბოლიკის გამოყენებასთან დაკავშირებით განაცხადა.

კობახიძემ თქვა, რომ საბჭოთა სიმბოლიკის გამოყენება სამწუხარო მოვლენაა და მნიშვნელოვანია, ვიზრუნოთ იმაზე, რომ ქვეყანაში რუსული გავლენა არ გაფართოვდეს.

"თქვენ ხედავთ, რომ გასული წლების განმავლობაში არათუ არ ფართოვდება, მცირდება რუსული გავლენა საქართველოში. ამაზე მეტყველებს არჩევნების შედეგებიც, პრორუსული პარტიები უფრი ნაკლებ ხმებს იღებენ საქართველოში. ეს არის ჩვენი ხელისუფლების ერთ-ერთი დამსახურება. აქციის მოწყობა შეუძლია ყველას, მთავარია — როგორია ამაზე ხელისუფლების რეაგირება", — თქვა კობახიძემ.

მეორე მსოფლიო ომში ფაშიზმზე გამარჯვებიდან 74-ე წლისთავის აღნიშვნის პარალელურად ვაკის პარკის მიმდებარე ტერიტორიაზე სამი აქცია გაიმართა. ილია ჭავჭავაძის გამზირზე რუსეთში დაფუძნებულმა ორგანიზაცია უკვდავთა პოლკმა მსვლელობა მოაწყო. მსვლელობის წინააღმდეგ ორი აქცია მიმდინარეობდა.