მთავრობას, საპატრიარქოსა და საზოგადოება ივერიისას შორის სამეცნიერო-კვლევითი და კულტურულ-საგანმანათლებლო ცენტრ-მუზეუმის აშენების მიზნით მემორანდუმი გაფორმდა. ცენტრ-მუზეუმის აშენება მახათას მთაზე მშენებარე ტაძრის მიმდებარედ იგეგმება.

დოკუმენტს საქართველოს პრემიერ-მინისტრმა მამუკა ბახტაძემ, საქართველოს კათოლიკოს-პატრიარქმა, ილია მეორემ და საზოგადოება "ივერიისას" თავმჯდომარემ გიორგი თავაძემ მოაწერეს ხელი.

საქართველოს პრემიერ-მინისტრმა განაცხადა, რომ პროექტს კულტურულ-საგანმანათლებლო დანიშნულებასთან ერთად ექნება კვლევითი ფუნქციაც აქვს, რაც თანხვედრაშია მთავრობის პრიორიტეტსა და ეროვნულ იდეასთან — განათლებასთან.

"ძლიერი ქართული სახელმწიფო ნიშნავს ძლიერ ეკლესიას და ძლიერი ეკლესია ნიშნავს ძლიერ ქართულ სახელმწიფოს. დარწმუნებული ვარ, ეს ერთობლივი პროექტი გახდება კიდევ ერთი სიმბოლო ჩვენი სახელმწიფოს ამ ძალიან მარტივი ჭეშმარიტებისა. ჩვენ ძალიან დიდ აქცენტს ვაკეთებთ განათლებაზე და დარწმუნებული ვარ, პროექტის რეალიზაციის შემდეგ ეს ადგილი ძვირფასი გახდება ყველასთვის, ვისაც უყვარს თავისი სამშობლო. ჩვენ გვაქვს ეროვნული საგანძური, რითაც ამაყობდნენ ჩვენი წინაპრები, ვამაყობთ ჩვენ და ჩვენი ვალდებულებაა, ის მომავალ თაობებს გადავცეთ. მთელმა მსოფლიომ უნდა იცოდეს, რა წვლილი გვაქვს შეტანილი ქართველ ერს მსოფლიო და ევროპული ცივილიზაციის ფორმირებაში", — განაცხადა მამუკა ბახტაძემ.

მემორანდუმის გაფორმება ისტორიულ ნაბიჯად შეაფასა პატრიარქმა.

"არის ისტორიული მნიშვნელობის ნაბიჯები და ასეთი ნაბიჯია გადადგმული დღეს. ღმერთმა დალოცოს ეს ნაბიჯი და ღმერთმა ინებოს, რომ გამოიღოს კეთილი შედეგი ჩვენი ერისა და ეკლესიის საკეთილდღეოდ", — განაცხადა უწმინდესმა.

ცენტრ-მუზეუმში განთავსებული საეკლესიო საგანძურის დაცვასა და მოვლა-პატრონობას მთავრობამ საკუთარ თავზე აიღო.