სასექსის ჰერცოგინია და ჰერცოგი მეგან მარკლი და პრინცი ჰარი მშობლები გახდნენ. დღეს, 6 მაისს, მეგან მარკლმა იმშობიარა და ბიჭი გააჩინა.

როგორც პრინცმა ჰარიმ ჟურნალისტებს უთხრა, დედაც და ბავშვიც "საოცრად კარგად" არიან. ახალშობილი 3 კილოგრამზე მეტს იწონის.

პრინცმა ჰარიმ გამოხატული მხარდაჭერისთვის და კეთილი სურვილებისთვის ყველას მადლობა გადაუხადა და აღნიშნა, რომ ბედნიერებისგან მეცხრე ცაზეა და საკუთარი ცოლით ძალიან ამაყობს. ჰარიმ დასძინა, რომ ის და მეგანი ბავშვის სახელზე ჯერ კიდევ ფიქრობენ:

"მეგანს და მე დღეს დილით ბიჭი შეგვეძინა, ძალიან ჯანმრთელი ბიჭი. დედა და ბავშვი საოცრად კარგად გრძნობენ თავს. ეს საოცარი და წარმოუდგენლად კარგი გამოცდილება იყო ჩემს ცხოვრებაში. გზა რომელსაც ამ დროს ქალი გადის, უბრალოდ შთამბეჭდავია. ჩვენ ორივე მადლიერი ვართ თქვენი გულთბილი მხარდაჭერისთვის და გვსურდა, რომ ეს ამბავი გაგვეზიარებინა".

სადღესასწაულო პოსტი გამოქვეყნდა წყვილის ინსტაგრამზეც.

მეგანი სამშობიაროში დილით გადაიყვანეს. მასთან იმყოფებოდა ჰარიც. წყვილთან ერთადაა მეგანის დედაც, დორია რაგლანდი.

ახალშობილი დედოფალი ელიზაბეტ მეორეს მეშვიდე შვილთაშვილია. ის ასევე სამეფო ოჯახის მეშვიდე წევრია, რომელმაც შესაძლოა მეფის გვირგვინი მიიღოს. მის წინ არიან პრინცი ჩარლზი, პრინცი უილიამი, უილიამის სამი შვილი და პრინცი ჰარი.

ჰარი და მეგანი 2018 წლის მაისში, უინძორების სასახლეში დაქორწინდნენ. მეგანის ორსულობის შესახებ ინფორმაცია სამეფო ოჯახმა ოქტომბერში გაავრცელა.