ეკონომიკის ახალდანიშნული მინისტრი ნათია თურნავა მიიჩნევს, რომ პანკისის ხეობაში ადგილობრივებსა და სამართალდამცავებს შორის მოხდარი დაპირისპირება გაუგებრობაა. პოლიცია პანკისში სწორედ ეკონომიკის სამინისტროს მოთხოვნით შევიდა.

"ამ ინციდენტმა, ამ გაუგებრობამ, ასე ვუწოდებდი მე მას წარმოაჩინა მთელი რიგი ობიექტური პრობლემა. პირველ რიგში, როდესაც ასეთი გაუგებრობა ხდება, რა თქმა უნდა, რა დოზის და რა ძალისხმევის კომუნიკაციაც არ უნდა ყოფილიყო ამის წინ, მაინც მეტი წილი პასუხისმგებლობა ეკისრება სახელმწიფოს", — განაცხადა მინისტრმა იმედი LIVE-ის ეთერში.

თურნავას თქმით, მომხდარმა წარმოაჩინა ბევრი "ობიექტური პრობლემა". მინისტრის განმარტებით, ეს პრობლემა ის დამოკიდებულებაა, რომელიც ბოლო პერიოდში ჰესების მიმართ გავრცელდა საქართველოს რეგიონებში.

თურნავამ განმარტა რატომ გაგზავნეს პოლიცია ხეობაში. მისი თქმით, სამინისტროს მიმართა კომპანიამ, რომელიც აწარმოებდა მშენებლობას და მოითხოვა შრომის უსაფრთხოების პირობების დაცვა. მისივე თქმით, ასეთ შემთხვევაში ვალდებული იყვნენ ეცნობებინათ შინაგან საქმეთა სამინისტროსთვის.

დაპირისპირება პანკისი ხეობაში

21 აპრილის დილას პანკისის ხეობაში, სოფელ ბირკიანში აქციის მონაწილეებსა და პოლიციას შორის დაპირისპირება მოხდა. ადგილობრივებმა მდინარე ალაზანზე მშენებარე ჰესზე ტექნიკის შესვლა გააპროტესტეს, რასაც იქ მობილიზებულ პოლიციასთან დაპირისპირება მოყვა. როგორც შინაგან საქმეთა სამინისტროში განმარტეს, დილას სოფელში პოლიცია ეკონომიკის სამინისტროს მიმართვის საფუძველზე შეიყვანეს, სპეცდანიშნულების რაზმები კი დაპირისპირების გამო დაამატეს.

ჰესების საკითხზე სალაპარაკოდ თელავში მთავრობისა და ადგილორივების წარმომადგენლებს შორის შეხვედრა გაიმართა, თუმცა პარალელურად პანკისში ვითარება დაიძაბა. სპეცრაზმმა აქციის მონაწილეების წინააღმდეგ ორჯერ ცრემლსადენი გაზი და რეზინის ტყვიები გამოიყენა. ადგილობრივებმა კი პოლიციას ქვები და ხელკეტები დაუშინეს. შსს-ს განცახდებით, შედეგად დაშავდა 55 ადამიანი, მათ შორის 38 სამართალდამცავი.

რამდენიმე საათში შემთხვევის ადგილას მთავრობის წარმომადგენლები ჩავიდნენ. შინაგან საქმეთა მინისტრმა, გიორგი გახარიამ თემის უხუცესებთან შეხვედრის შემდეგ განაცხადა, რომ ჰესი მანამ არ აშენდება, სანამ მოსახლეობის 90%-ს არ ექნება ამის სურვილი.

მთავრობის ადმინისტრაციამ დაპირისპირების შემდეგ განცხადება გაავრცელა, რომელშიც ჰესების სარგებლიანობაზე ისაუბრეს. მათი თქმით, საჭირო იყო ამ ინფორმაციის ადგილობრივებისთვის მიწოდება.