უკვე ერთი წელია, რაც ავსტრალიურმა კომპანიამ, ციფრული მარკეტინგის სააგენტომ Versa ოთხშაბათობით მუშაობა აკრძალა, დასაქმებულებს კი ისევ ხუთი დღის სამუშაოს საფასურს უხდის.

თანამშრომლები იგივე სამუშაო საათებში მუშაობენ, როგორც მანამდე. შეხვედრები ოთხშაბათობით ჩანიშნული არაა, თუმცა თუ კლიენტს სასწრაფო საქმე აქვს, რომელიც აუცილებლად იმ დღესვე უნდა შესრულდეს, თანამშრომელი მას მხოლოდ ამ შემთხვევაში პასუხობს.

"ყველას გვინდა, რომ ამ გეგმამ გაამართლოს, რადგანაც მოგვწონს ასეთი მოქნილი გრაფიკი. თუ მინდა, რომ ოთხშაბათობით მუშაობა არ მომიწიოს, ჩემს კვირას უკეთ ვგეგმავ", — ამბობს პროექტის ხელმძღვანელი, შრაუენი.

კომპანიის პოლიტიკა გასულ ივლისს შეიცვალა. როგორც Versa-ს დამფუძნებელი და აღმასრულებელი კეტ ბლექჰემი ამბობს, ამის შემდეგ, კომპანიის მოგება თითქმის გასამმაგდა, ხოლო შემოსავალი 46%-ით გაიზარდა.

"მუშაობის ეს სტილი ერთი შეხედვით ყველაზე შეუსაბამო ინდუსტრიაში — სერვისებზე დაფუძნებულ პლატფორმაზე დავგეგმეთ. ეს ინდუსტრია საკუთარი გრძელი სამუშაო საათებითაა ცნობილი, თანამშრომლები მაშინაც მუშაობენ, როდესაც ინოვაციური იდეები ჩნდება", - ამბობს ბლექჰემი.

შუა კვირის დასვენების დღეს დასაქმებულები სავარჯიშო დარბაზში, სახლის საქმეებზე, ან ოჯახის წევრებთან ატარებენ.

რატომ მაინცდამაინც ოთხშაბათი?

ბლექჰემის გადაწყვეტილებით, ოთხშაბათმა თითქოს ორი "მინი-კვირა" შექმნა და იმ ორშაბათობის შეგრძნება, რომელიც თანამშრომლების უმრავლესობას აქვს, ფაქტობრივად, გაქრა.

პროფესორი ჯაროდ ჰაარი არ გაუკვირვებია იმ ფაქტს, რომ ოთხშაბათის სამუშაო დღედ გაუქმება კომპანიისთვის წარმატებული აღმოჩნდა. ადამიანების რესურსების მართვის პროფესორმა ჰაარმა, საკუთარი კვლევის მიხედვით დაასკვნა, რომ ადამიანთა უმრავლესობას ურჩევნია ოთხშაბათს ჰქონდეს თავისუფალი დღე.

"დასაქმებულთათვის ამ პოლიტიკის გატარება ნიშნავს იმას, რომ ხუთშაბათს სამსახურს უფრო დასვენებული უბრუნდები, რაც უკვე მეტ პროდუქტიულობაზე მიუთითებს", — ამბობს ის.

თუმცა, ზოგ შემთხვევაში, ასეთმა გრაფიკმა არ გაამართლა. მაგალითად, შვედეთში ყოველდღე 6-საათიანი მუშაობისას დაასკვნეს, რომ დასაქმებულთა პროდუქტიულობა იზრდებოდა, თუმცა ხარჯები იმდენად იზრდებოდა, რომ მათი სამსახურიდან გაშვება უწევდათ.

ასევე აშშ-ში, რამდენიმე სტარტაპს, რომელიც ცოტა ხნით 4-დღიან სამუშაო კვირაზე გადავიდა, ისევ უკან, 5-დღიან გრაფიკზე დაბრუნება მოუწია, რადგან კომპანია ნაკლებად კონკურენტული ხდებოდა და თანამშრომლებიც მეტად ისტრესებოდნენ.

მიუხედავად ამისა, ბარნი, Perpetual Guardian-ის დამფუძნებელი ამჟამად 50 კომპანიასთან ტრენინგებს ატარებს იმაზე, თუ როგორ უნდა განხორციელდეს 5-დღიანი სამუშაო კვირა.

როგორც პროფესორი, რეი კუპერი ამბობს, კიდევ ერთი მნიშნელოვანი საკითხია ქალების დაკარგვა სამუშაო ძალიდან.

"ავსტრალიაში ქალების საშუალო ასაკი, რომლებიც შვილს აჩენენ, 30 წელია. სწორედ ამ დროს ვხდებით ყველაზე პროდუქტიული თანამშრომლები და ვაღწევთ დასახულ მიზნებს. ჩვენ ქალებს იმიტომ ვკარგავთ სამუშაო ძალიდან, რომ მათ არჩევანს ვუტოვებთ დედობასა და პროდუქტიულ თანამშრომელს შორის", - ამბობს ის.