თბილისის მერის, კახა კალაძის განცხადებით, ტაქსის მძღოლებს, რომლებმაც ვაუჩერების აღება ვერ მოახერხეს, ვადა გაუხანგრძლივდებათ. მისი თქმით, ვაუჩერების აღებას მძღოლები პირველიდან 15 მაისის ჩათვლით შეძლებენ. ამის შესახებ კალაძემ დედაქალაქის მთავრობის სხდომაზე ისაუბრა.

მისი განმარტებით, ტექნიკური დათვალიერების გავლიდან ორი კვირის განმავლობაში ტაქსის მძღოლებს შესაბამისი კომპანიისთვის უნდა მიემართათ და როგორც გადაღებვის ან ფირის გადაკვრის, ასევე ქიმწმენდის ვაუჩერი მიეღოთ. მისივე თქმით, კომუნიკაციის ფარგლებში გაირკვა, რომ 1 500-მდე ტაქსის მძღოლმა გარკვეული მიზეზების გამო არ მიმართა კომპანიას და ვერ მიიღო ვაუჩერები.

"საინიციატივო ჯგუფთან კომუნიკაციის შემდეგ მივიღეთ გადაწყვეტილება, რომ მათ გავუხანგრძლივოთ ვაუჩერის მიღების ვადა და ამ 1 500-მდე მძღოლს ექნება შესაძლებლობა, პირველი მაისიდან 15 მაისის ჩათვლით მიმართონ შესაბამის კომპანიას და მიიღონ როგორც ფერის შეცვლის, ასევე ქიმწმენდის ვაუჩერები", — თქვა კალაძემ.

ახალი რეგულაციები

თბილისში 2019 წლის პირველი ოქტომბრიდან თეთრი ფერის ტაქსები იმოძრავებენ. ამის შესახებ თბილისის მერმა, კახა კალაძემ დედაქალაქის მთავრობის 26 სექტემბრის სხდომაზე განაცხადა.

პირველი ოქტომბრიდან ტაქსის სერვისის განხორციელებას ვერ შეძლებენ სამკარიანი და მარჯვენა საჭიანი ავტომობილები.

კახა კალაძის ინფორმაციით, მოცემულ ეტაპზე, ტაქსის სერვისის განხორციელებაზე 6 200-ზე მეტი ნებართვაა გაცემული. პირველი ოქტომბრიდან კი, ამ საქმიანობის შესაბამისი ლიცენზიის გარეშე განხორციელება 200 ლარით დაჯარიმდება.

კახა კალაძე ამბობს, რომ სატრანსპორტო პოლიტიკის მეორე ეტაპია ვიზუალური სტანდარტი, ყველა ტაქსი მომავალი წლის პირველი ოქტომბრიდან თბილისში თეთრი უნდა იყოს.