პანკისის ხეობაში, მდინარე ალაზანზე მცირე ჰესის "ხადორი 3"-ის სამშენებლო სამუშაოების განახლებას ადგილობრივი მოსახლეობის პროტესტი მოჰყვა. დღეს, 21 აპრილის დილას სოფელ ბირკიანში აქციის მონაწილეებსა და პოლიციას შორის დაპირისპირება მოხდა. ადგილობრივი მედიის პანკისის სათემო რადიოს ინფორმაციით, სპეცრაზმმა აქციის მონაწილეების წინააღმდეგ ცრემლსადენი გაზი და რეზინის ტყვიები გამოიყენა. დაშავებულია რამდენიმე მოქალაქე.

ადგილობრივები ამბობენ, ჰესების მშენებლობის გაგრძელების უფლებას არავის მისცემენ. ადგილზე ჩავიდა შს მინისტრის მოადგილე, კახაბერ საბანაძე, რომელმაც შეკრებილებს უთხრა, რომ გამოყონ ვინმე მოლაპარაკებებისთვის. მისივე თქმით, მოლაპარაკება თელავში გაიმართება. მან პანკისის ხეობის მცხოვრებლებს უთხრა, რომ ჰესის სამშენებლო სამუშაოები ამ მომენტისთვის შეჩერებულია.

"ვინც კანონს დაარღვევს და პოლიციელს შეეხება, უმკაცრესად დაისჯება. სანაცვლოდ გეუბნებით, პოლიციელები უკანონო ქმედებას არ ჩაიდენენ... მოგოწოდებთ, შეინარჩუნოთ მშვიდობა", — განაცხადა კახა საბანაძემ.

ადგილზე გრძელდება ასობით ადამიანის პროტესტი, კვლავ მობილიზებულია სპეცრაზმი და პოლიციის ტექნიკა, მათ შორის წყლის სატყორცნი მანქანები. შინაგან საქმეთა სამინისტროში აცხადებენ, რომ ახმეტის მუნიციპალიტეტში ეკონომიკის სამინისტროს მიმართვის საფუძველზე განალაგეს პოლიციელთა შესაბამისი რაოდენობა.

"შესაძლო დაპირისპირების, ან პროვოკაციების თავიდან ასაცილებლად შინაგან საქმეთა სამინისტრო უზრუნველყოფს საზოგადოებრივი წესრიგის დაცვას. სამართალდარღვევის ნებისმიერი ფაქტს პოლიციის მხრიდან, კანონის ფარგლებში, მოჰყვება დაუყოვნებლივი რეაგირება და იქნება აღკვეთილი", — აცხადებენ სამინისტროში.

მდინარე ალაზანზე შპს ალაზანი ენერჯის მიერ დაგეგმილი ჰიდროელექტროსადგურის — "ხადორი 3" მშენებლობის ნაბართვის ბათილად ცნობას ითხოვდა ადამიანის უფლებათა სწავლებისა და მონიტორინგის ცენტრი (EMC). მოსახლეობა ხეობაში მესამე ჰესის მშენებლობის შემთვევაში ხეობის უნიკალური ეკოლოგიური სისტემისა და სოციალური გარემოს დაზიანების მაღალ რისკებზე საუბრობს.