პარიზის ღვთისმშობლის ყველაზე პატარა ბინადრები, ფუტკრები გადაურჩნენ ხანძარს, რომელმაც ტაძრის სახურავის დიდი ნაწილი და ცნობილი შპილი გაანადგურა. 200 ათასი ფუტკრის სამი სკა ტაძრის სახურავზეა განლაგებული.

ნოტრ-დამის სკებს მეფუტკრე ნიკოლას გეანტი 2013 წლიდან უვლის. სკების დადგმას პარიზში ფუტკრების პოპულაციის გაზრდის ინიციატივას უკავშირდება. სკები პარიზის ღვთისმშობლის ტაძრის სამხრეთ ნაწილში, მთავარი სახურავიდან 30 მეტრით დაბლაა განლაგებული.

სხვებისგან განსხვავებით ევროპული სახეობის ფუტკრები მას შემდეგ, რაც საფრთხეს იგრძნობენ სკაში რჩებიან, რათა თავიანთი სახლი დაიცვან. როგორც მეფუტკრე ამბობს, მაღალი ტემპერატურა მათთვის დიდ საფრთხეს წარმოადგენს, თუმცა კვამლი მათ არ კლავს, არამედ ათრობს და აძინებს. მეფუტკრეები ხშირად სწორედ კვამლს გამოიყენებ იმისათვის, რომ ფუტკრები დაამშვიდონ და სკაზე წვდომა იქონიონ.

15 აპრილს საფრანგეთში, პარიზის ღვთისმშობლის ტაძარში ხანძარი გაჩნდა. პარიზის პროკურატურაში გამოძიების წინასწარ შედეგებზე დაყრდნობით აცხადებენ, რომ ტაძარში ცეცხლი შემთხვევით გაჩნდა.

მეხანძრეებმა ტაძრის სტრუქტურის სრული განადგურებისგან გადარჩენა შეძლეს. ხანძრის შედეგად, ტაძრის ხის სახურავი მთლიანად დაიწვა. პარიზის ღვთისმშობლის ტაძრის წარმომადგენლები აცხადებენ, რომ ხანძარი რელიკვიებს არ შეხებია.

პარიზის ღვთისმშობლის ტაძარი ცნობილი, როგორც ნოტრ-დამი — გოტიკური საკათედრო ტაძარია პარიზის ილ-დე-ლა-სიტეს აღმოსავლეთ ნაწილში. ის დღემდე მოქმედი რომაულ-კათოლიკური კათედრალია. პარიზის ნოტრ-დამი ფრანგული გოთიკური არქიტექტურის ერთ-ერთ ყველაზე დახვეწილ ნიმუშად ითვლება.

ამავე თემაზე: