მომღერალ ნინა წკრიალაშვილის პირადი ცხოვრების ამსახველი კადრების გავრცელების საქმეზე თებერვალში ერთი პირი დააკავეს. ამის შესახებ ინფორმაცია On.ge-ს შინაგან საქმეთა სამინისტროდან მიაწოდეს.

უწყების ინფორმაციით, გამოძიება სისხლის სამართლის კოდექსის 157-ე მუხლის პირველი ნაწილით და 284-ე მუხლის პირველი ნაწილით მიმდინარეობს, რაც კომპიუტერულ სისტემაში უნებართვო შეღწევას და პირადი ცხოვრების საიდუმლოს ხელყოფას გულისხმობს.

"დანაშაულის ჩამდენი სხვა პირების დადგენის მიზნით გამოძიება გრძელდება. დაიკითხება ყველა ის პირი, ვინც შესაძლოა ინფორმაციას ფლობდეს აღნიშნულ დანაშაულთან დაკავშირებით", — უთხრეს On.ge-ს შსს-ში.

გუშინ, 15 აპრილს, რუსთავი 2-ის გადაცემა ფარულ კონვერტში მომღერალმა, ნინა წკრიალაშვილმა თქვა, რომ იანვარში მისი პირადი ცხოვრების ამსახველი კადრები ინტერნეტში, ერთ-ერთ პორნოსაიტზე ატვირთეს. მომღერალმა განაცხადა, რომ მისი ტელეფონის "გატეხვა" და პირადი ცხოვრების ამსახველი კადრების გავრცელება იმ ადამიანმა შეუკვეთა, ვისთანაც რომანი ჰქონდა და დაშორდა. მან ამ ადამიანის სახელი და გვარიც დაასახელა. წკრიალაშვილმა თქვა, რომ სწორედ დაშორების გამო გადაუხადა ამ პირმა სამაგიერო. გადაცემაში მან აღნიშნა, რომ კაცი მას დღემდე ემუქრება.