საქართველოს პარლამენტის თავმჯდომარე, ირაკლი კობახიძე, ნინო ლომჯარიას პასუხობს და აღნიშნავს, რომ პარლამენტის რეგლამენტი კანონშემოქმედებით პროცესში სახალხო დამცველის მონაწილეობას არ ითვალისწინებს.

"ეს არის შეუძლებელი. კარგად იცით, რეგლამენტი როგორ არის გაწერილი. რეგლამენტის თანახმად, პარლამენტის მომხსენებელი, რომელიც უნდა იყოს დეპუტატი, ამ შემთხვევაში გამოდის თანამომხსენებელი, ასევე დეპუტატი. სახალხო დამცველის მონაწილეობას არანაირი ფორმით არ ითვალისწინებს რეგლამენტი, რაც ბუნებრივია სწორია", — განაცხადა ირაკლი კობახიძემ პირველ არხთან საუბრისას.

სახალხო დამცველმა ნინო ლომჯარიამ ირაკლი კობახიძეს უპასუხა და განმარტა, რომ ის კანონშემოქმედებით პროცესში ჩართვას არ ითხოვს, მას სურს აღსრულდეს რეგლამენტის 154-ე მუხლი, რომლის მიხედვითაც სახალხო დამცველს აქვს უფლება პარლამენტის სესიაზე მიმართოს დეპუტატებს. მისი აზრით, კანონპროექტის მიღების შემდეგ მიმართვა აზრს დაკარგავს.

"რასაც ჩვენ ვითხოვთ, არის ის, რომ მიმართვის შესაძლებლობა სახალხო დამცველს მიეცეს, სანამ პარლამენტი მეორე მოსმენით უყრის კენჭს კანონპროექტს, რადგან მიმართვის თემატიკა შეეხება სწორედ უზენაესი სასამართლოს მოსამართლეების შერჩევის პროცესსა და იმ საკანონმდებლო ხარვეზებს, რაც წარმოდგენილ კანონპროექტს ახასიათებს", — თქვა ნინო ლომჯარიამ.

საქართველოს სახალხო დამცველი, ნინო ლომჯარია უზენაესი სასამართლოს მოსამართლეთა არჩევის წესთან დაკავშირებით პარლამენტს მოხსენებით მიმართავს. ეს პირველი შემთხვევაა, როცა ომბუდსმენი გამოიყენებს პარლამენტის რეგლამენტით განსაზღვრულ კომპეტენციას.

საქართველოს პარლამენტში ვენეციის კომისიის დასკვნამდე, მეორე მოსმენით განიხილავენ უზენაესის მოსამართლეთა არჩევის წესის შესახებ მომზადებულ კანონპროექტს. მიუხედავად არასამთავრობო სექტორისა და ოპოზიციის მოწოდებისა, უმრავლესობამ მიიღო გადაწყვეტილება, რომ საკომიტეტო მოსმენა დღეს გამართოს. ვენეციის კომისიის დასკვნა ხვალ, 16 აპრილს გამოქვეყნდება.