ბოლო პერიოდში, Facebook-ის ქართველი მომხმარებლები, აქტიურად აშეარებენ სტატიას იმის შესახებ, რომ ისლანდიის მთავრობა სიძეებს ეძებს.

სტატიის მიხედვით, ისლანდიის საგარეო საქმეთა სამინისტროს გამოუცხადებია, რომ ქვეყანაში მამრობითი სქესის ადამიანების ნაკლებობაა და ამიტომ ეძებენ ემიგრანტებს, რომლებიც ისლანდიელ ქალებზე იქორწინებენ. ამავე ინფორმაციით, რეიკიავიკში ჩასიძებული ადამიანები თვეში 5 000 ევროსაც მიიღებენ.

აღნიშნული ინფორმაცია ქართულმა მედიამ, ტრადიციულად, გადამოწმების გარეშე აიტაცა.

საქმე ისაა, რომ აღნიშნული ინფორმაცია პირველად ივნისში, ერთ-ერთ უცნობ და პატარა საინფორმაციო საიტზე გამოქვეყნდა - The Spirit Whispers. ინფორმაციის მიხედვით, ისლანდიის მთავრობა ჩრდილო აფრიკელ მამაკაცებს ანიჭებს უპირატესობას.

აღნიშნული ინფორმაციით ბევრი ადამიანი მოტყუვდა და საქმე იქამდეც მივიდა, რომ დანიის საელჩო ეგვიპტეში, რომელიც ისლანდიის წარმომადგენლის როლსაც ასრულებს, იძულებული გახდა ოფიციალური განცხადება გამოექვეყნებინა.

ფოტო: Embassy Of Denmark In Egypt

ისლანდიური მედია იტყობინება, რომ ამ ინფორმაციის გავრცელების შემდეგ, ისლანდიელ ქალებს სოციალურ ქსელებში უამრავი მესიჯი და მეგობრობის მოთხოვნა მისდით.

გარდა ამისა, სტატისტიკურად ისლანდიაში უფრო მეტი მამაკაცი ცხოვრობს ვიდრე ქალი. ყოველ ათას ქალზე 1 129 მამაკაცი მოდის.