თბილისის საკრებულოს უმრავლესობის ყოფილი წევრი, ვატო შაქარიშვილი ამბობს, რომ ქართული ოცნების დამფუძნებელს, ბიძინა ივანიშვილს, როგორც ლიდერს, "ძალიან მძიმე სიმპტომები აქვს". მისივე თქმით, ივანიშვილის არასწორად ხედავს და აფასებს წარსულს.

"ვერ აღიქვამს ჩვენს დღევანდელ კონტექსტსა და რეალობას და ვერ გრძნობს საზოგადოებას. შეუძლებელია, ამ ყველაფერმა საფრთხე არ შეუქმნას ჩვენი ქვეყნის ხვალინდელ დღეს", — განაცხადა შაქარიშვილმა TV პირველის ეთერში.

შაქარიშვილმა პარლამენტის ამჟამინდელი მოწვევა შეაფასა და თქვა, რომ ის "სამარცხვინოა":

"ნაცვლად იმისა, რომ პარლამენტარები მუშაობდნენ პოლიტიკის შექმნაზე, ისინი დაკავებული არიან ადამიანებთან პირადი ანგარიშსწორებით და დაკავებული არიან იმაზე საუბრით, თუ როგორ ვერ გაარჩიეს წითელი და მწვანე ღილაკები და ხანდახან ერთმანეთში მისაწერი ტექსტები ეშლებათ".

დღეს, 11 აპრილს ვატო შაქარიშვილმა და ჯაბა ჯიშკარიანმა თბილისის საკრებულოში უმრავლესობა დატოვეს. ისინი ქართული ოცნებიდან მოსამართლეების თემაზე დაწყებული დაპირისპირების გამო წავიდნენ.

"მორალური ფასეულობებისაგან გადახვევა ხდება. ჩვენთვის მიუღებელია პრინციპული ადამიანების ბრძოლის უშედეგოდ გამოცხადება. მათი ნაცებად გამოცხადება. ეს ყველაფერი კრიტიკულ წინააღმდეგობაშია 2012 წლის იდეალებთან და იმ დაპირებებთან, რომელიც საპრეზიდენტო არჩევნების წინ გაიცა", — განაცხადა შაქარიშვილმა.