გირგვლიანის საქმის ადვოკატი, დავითა ჯანდიერი ამბობს, რომ ქართული ოცნების დამფუძნებლის, ბიძინა ივანიშვილის განცხადება საქმის გასაჩივრებასთან დაკავშირებით წინასაარჩევნოდ შალვა შავგულიძის დისკრედიტაციის მცდელობაა.

"ჩემთვის აბსოლუტურად წარმოუდგენელია, როგორ შეიძლება საუბარი [ლევან] მურუსიძის, მისი როლიდან გამომდინარე ამ საქმეში და იქიდან გამომდინარე, რაც მას შეეძლო გაეკეთებინა და უნდა გაეკეთებინა კანონის მიხედვით, კონსტიტუციის მიხედვით და არ გააკეთა და მის სიკეთეებზე საუბარი და შალვა შავგულიძის დემონიზირება", — განუცხადა ადვოკატმა რუსთავი 2-ს.

დავით ჯანდიერი გირგვლიანის საქმის ადვოკატი სტრასბურგის სასამართლოში იყო. მისი თქმით, გასაჩივრების საკითხის წამოწევა სპეკულაციაა:

"სხვა არაფერი იმიტომ, რომ ამ საქმეს შედეგობრივი თვალსაზრისით არაფერი არ დაკლებია და მივიღეთ ის შედეგი რა შედეგსაც ველოდით თავიდანვე".

ბიძინა ივანიშვილმა ტელეკომპანია იმედს განუცხადა, რომ გირგვლიანის საქმეში დამნაშავე არა მოსამართლე ლევან მურუსიძე, არამედ ადვოკატი შალვა შავგულიძე, რადგან მან საქმეზე საქალაქო სასამართლოს გადაწყვეტილება, სააპელაციოს გამოტოვებით უზენაესში გაასაჩივრა.

ივანიშვილის საპასუხოდ შავგულიძემ განაცხადა, რომ მაშინდელი კანონმდებლობით, დაზარალებულს არ შეეძლო მოეთხოვა მსჯავრდებულის ქმედებისთვის უფრო მძიმე კვალიფიკაციის მინიჭება ან საქმის ძიებაში დაბრუნება.

მისივე განმარტებით, მათ შეეძლოთ მსჯავრდებულთათვის არსებული კვალიფიკაციის ფარგლებში შედარებით უფრო მძიმე სასჯელის დაკისრება მოეთხოვათ, რაც მათი მიზანი არ ყოფილა. ის აღნიშნავს, რომ მათი მოთხოვნის დაკმაყოფილების შემთხვევაში გირგვლიანის საქმის წარმოება სააპელაციო ინსტანციაში დასრულდებოდა, შესაბამისად, არც საკასაციო ინსტანციისთვის და არც ევროპული სასამართლოსთვის მიმართვის შესაძლებლობა აღარ ექნებოდათ.