მარნეულის მერიამ ადგილობრივ საკრებულოს ყოფილი მერისთვის, თემურ აბაზოვისთვის 32 ათასი ლარის გადახდაზე უარი უთხრა. ამის შესახებ ინფორმაცია თავდაპირველად მარნეულის სათემო რადიომ გაავრცელა, მერიაში კი On.ge-ს დაუდასტურეს.

"მერიის მხრიდან საკრებულოსთვის გადაგზავნილი იქნა პასუხი, სადაც განმარტებულია, რომ თემურ აბაზოვის განცხადება მისი სამსახურეობრივი უფლებამოსილების პერიოდში განაცდური ხელფასის ანაზღაურების თაობაზე ვერ იქნება დაკმაყოფილებული სამართლებრივი საფუძვლების არარსებობის გამო", — განუცხადეს მერიაში On.ge-ს.

32 ათასი ის თანხაა, რომელიც აბაზოვს შვიდი თვე ციხეში ყოფნის ნაცვლად მერის თანამდებობაზე მუშაობის შემთხვევაში უნდა მიეღო. აბაზოვს ბრალი მოქალაქის მიმართ დამამცირებელ და არადამიანურად მოპყრობაში ედება. მან საკრებულოს განაცდურის ასანაზღაურებლად რამდენიმე კვირის წინ მიმართა.

თემურ აბაზოვი არაადამიანური მოპყრობის ბრალდებით 2018 წლის 13 ივნისს დააკავეს, მას შემდეგ, რაც სტუდია მონიტორის საგამოძიებო მასალა გავრცელდა. მასალაში ასახული იყო, რომ მოქალაქე, რომელმაც საქართველოს ყოფილ პრემიერს, ბიძინა ივანიშვილისა და მარნეულის მერს, თემურ აბაზოვს აგინა, ძალადობის მსხვერპლი გახდა.

"გავრცელდა ვიდეოები, სადაც ეს მოქალაქე ბოდიშს იხდის და სახეზე, სავარაუდოდ, შარდს ისვამს", — აღნიშნულია სტუდია მონიტორის მიერ გავრცელებულ მასალაში.

აბაზოვი 13 დეკემბერს აღკვეთის ღონისძიება პატიმრობა 10 000-ლარიანი გირაოთი შეეცვალა.