თბილისში, ჭავჭავაძის გამზირის #5-ში მშენებლობაზე მიწაში მოყოლილი ორივე მუშის ცხედარი ნაპოვნია. ცოტა ხნის წინ ამოიყვანეს მეორე, 1979 წელს დაბადებული კაცის ცხედარი, მანამდე კი 26 წლის მუშა გადაასვენეს პროზექტურაში. სამძებრო-სამაშველო ღონისძიება რვა საათის განმავლობაში მიმდინარეობდა. ადგილზე მუშაობდა 35 მეხანძრე-მაშველი.

შემთხვევა დღეს საღამოს, 31 მარტს მოხდა ვაკეში, ჭავჭავაძის გამზირზე მიმდინარე მშენებლობისას. ადგილზე მისულმა მერიის წარმომადგენელმა, გიორგი ბაგრატიონმა ჟურნალისტებს უთხრა, რომ მიწა ნაგებობის საძირკველის გამაგრების დროს ჩამოიშალა. მისივე თქმით, ერთი კვირის წინ შეამოწმეს კომპანია და უსაფრთხოების ნორმების მხრივ ყველა დოკუმენტი ჰქონდა მწყობრში, მაგრამ, როგორც ის ამბობს, კომპანიას კიდევ ერთხელ შეამოწმებენ.

ადგილზე მრავალპროფილური საავადმყოფო შენდება. სამშენებლო სამუშაოებს აწარმოებს სააქციო საზოგადოება ტრანსმშენი. შინაგან საქმეთა სამინისტრომ უკვე დაიწყო გამოძიება სისხლის სამართლის კოდექსის 240-ე მუხლით, რაც სამთო სამშენებლო და სხვა სამუშაოების დროს უსაფრთხოების წესების დარღვევას გულისხმობს.