პრეზიდენტ დონალდ ტრამპის თქმით, აშშ-მ გოლანის მაღლობებზე ისრაელის სუვერენიტეტი უნდა აღიაროს. ამის შესახებ ტრამპმა ტვიტერზე დაწერა.

"52 წლის შემდეგ დრო მოვიდა, რომ აშშ-მ ისრაელის სუვერენიტეტი აღიაროს გოლანის მაღლობებზე, რომელთაც ისრაელის უსაფრთხოებისთისა და რეგიონული სტაბილურობისთვის კრიტიკული მნიშვნელობა აქვთ", — წერს ტრამპი.

ისრაელის პრემიერ-მინისტრმა, ბენიამინ ნეთანიაჰუმ კი დონალდ ტრამპს მხარდაჭერისთვის მადლობა გადაუხადა. მისივე თქმით, ისრაელის გასანადგურებლად ირანი სირიას იყენებს. გარდა ამისა, ნეთანიაჰუმ აღნიშნა, რომ ტრამპი თავისი საქციელით ისტორიაში შევიდა.

ისრაელმა სირიის ტერიტორიაში შემავალი გოლანის მაღლობები 1967 წელს, ექვსდღიანი ომის შემდეგ დაიკავა. მას, დაახლოებით, ტერიტორიის 2/3 აქვს დაკავებული, დანარჩენი სირიის კონტროლის ქვეშაა.

საერთაშორისო დონეზე მაღლობების ოკუპაცია აღიარებული არაა და სირია სრული კონტროლის აღდგენას მოითხოვს. ჯერჯერობით დამასკოში ტრამპის განცხადება არ შეუფასებიათ.

1981 წელს ისრაელის პარლამენტმა მიიღო კანონი, რომლითაც გოლანის მაღლობებზე თავის იურისდიქციის გავრცელებას ითვალისწინებდა. გაეროს უშიშროების საბჭო ისრაელის იურისდიქციას არ აღიარებს, ხოლო გენერალურმა ასამბლეამ გოლანის დაკავებას ანექსია უწოდა.

2017 წელს დონალდ ტრამპმა ისრაელის დედაქალაქად იერუსალიმი აღიარა და ამერიკის საელჩო იქ გადაიტანა. აშშ პირველი ქვეყანა გახდა, რომელმაც იერუსალიმზე ისრაელის სუვერენიტეტი აღიარა.