ფეისბუქმა განაცხადა, რომ ის მილიონობით მომხმარებლის პაროლებს სათანადოდ არ იცავდა და მათ კომპანიის მონაცემთა ბაზაში არსებულ უბრალო, დაუშიფრავ ტექსტურ ფაილში ინახავდა, რომელიც კომპანიის თანამშრომლებისათვის ადვილად ხელმისაწვდომი იყო. ამის შესახებ CNN Business წერს.

ფეისბუქის ცნობით, მომხმარებლების პაროლები იანვარში ჩატარებული უსაფრთხოების შემოწმების დროს აღმოაჩინეს. კომპანია არ ამბობს, რამდენი ხნის განმავლობაში ინახებოდა მომხმარებლების პაროლები მსგავსი ფორმით.

"ამ პაროლებზე წვდომა კომპანიის თანამშრომლების გარდა არავის ჰქონდა. ჩვენ ასევე ვერ დავაფიქსირეთ ვერანაირი კვალი იმისა, რომ ამ ფაილს კომპანიის შიგნიდან ვინმე არასწორი მიზნებისთვის იყენებდა", — განაცხადა ფეისბუქის ვიცე-პრეზიდენტმა, პედრო კანავუატიმ.

მან ასევე დასძინა, რომ, როგორც წესი, ფეისბუქი იცავს მომხმარებლების პაროლებს, როცა ისინი ქმნიან ანგარიშს, შედეგად, კომპანიაში მათი დანახვა არავის შეუძლია.

ჟურნალისტი ბრაინ კრებსი, რომელმაც ამ საკითხზე პირველად დაწერა, აცხადებს, რომ ორიათასამდე ინჟინერმა და დეველოპერმა 9 მილიონჯერ მიმართა პაროლების ძიებას შიდა ფაილში. გაირკვა, რომ ფეისბუქი პაროლების დაშიფვრის ინსტრუმენტს არ იყენებდა.

კომპანიის ცნობით, ფეისბუკისა და ინსტაგრამის მომხარებლები, რომელთა პაროლებიც მსგავსი ფორმით ინახებოდა, შესაბამის შეტყობინებას მიიღებენ.