ზუსტად 25 წლის წინ, 1994 წლის 21 მაისს კანის კინოფესტივალზე კვენტინ ტარანტინოს კლასიკად ქცეული ფილმის Pulp Fiction პრემიერა შედგა. სწორედ ამ დიდებული თარიღის აღსანიშნავად, დიდი ალბათობით, სწორედ კანში შედგება ტარანტინოს რიგით მეცხრე ფილმის ერთხელ ჰოლივუდში პრემიერა.

მართალია, ჯერ ეს ცნობა ოფიციალურად არავის დაუდასტურებია, თუმცა The Hollywood Reporter-ს წყარომ უთხრა, რომ ფესტივალის ორგანიზატორებმა რეჟისორთან შეთანხმებას უკვე მიაღწიეს და კროიზეტის ბულვარში დაგებულ წითელ ხალიჩაზეც სულმოუთმენლად ელიან.

ტარანტინოს ახალ ფილმში მთავარ როლებს ლეონარდო დიკაპრიო, ბრედ პიტი, მარგო რობი და ალ პაჩინო ასრულებენ.

ფილმის სიუჟეტი 1969 წელს ლოს-ანჯელესში ვითარდება. სწორედ იმ პერიოდში როდესაც მენსონის კრიმინალური სექტა ნელ-ნელა ძალას იკრებს, მათი ერთ-ერთი მსხვერპლი კი რომან პოლანსკის ორსული ცოლი, მარგო რობი გახდა.

"ფილმის სცენარზე ხუთი წლის განმავლობაში ვმუშაობდი. ლოს-ანჯელესში ჩემი ცხოვრების ძალიან დიდი ნაწილი მაქვს გატარებული. იქ ვიყავი 1969 წელსაც, მაშინ შვიდი წლის ვიყავი. ერთი სული მქონდა როდის მოვყვებოდი ისტორიას იმ პერიოდის ქალაქსა და ჰოლივუდზე. უბედნიერესი ვარ, რომ ამ საქმეში ჩემი პარტნიორები დიკაპრიო და პიტი იყვნენ", - ამბობს ტარანტინო.

Once Upon a Time in Hollywood-ის მსოფლიო პრემიერა 26 ივლისს გაიმართება, თუმცა მანამდე მას მაყურებელი, დიდი ალბათობით, სწორედ კანში ნახავს.

ფესტივალი 14 მაისს დაიწყება და 25 მაისის ჩათვლით გაგრძელდება.