პარლამენტმა ზვიად კვაჭანტირაძე დიასპორის საკითხების კომიტეტის თავმჯდომარეობიდან პირველ ცდაზე ვერ გადააყენა. დეპუტატის გადაყენებას 67 დეპუტატმა დაუჭირა მხარი, წინააღმდეგი იყო 8, თუმცა კვორუმისთვის 76 დეპუტატის ხმა იყო საჭირო.

პარლამენტის თავმჯდომარის, ირაკლი კობახიძის თქმით, ამ საკითხს ორ კვირაში დაუბრუნდებიან. ამასთანავე, კვანაჭანტირაძის ადგილას უმრავლესობა ბექა ოდიშარიას განიხილავს.

დღეს, 19 მარტს პლენარულ სხდომაზე კომიტეტის თავმჯდომარეობიდან ზვიად კვაჭანტირაძის მოხსნის საკითხი განიხილეს. როგორც კობახიძემ განაცხადა, კვაჭანტირაძის მოხსნის გადაწყვეტილება ქართული ოცნების 18 მარტის სხდომაზე მას შემდეგ მიიღეს, რაც კვაჭანტირაძემ უმრავლესობა დატოვა.

ოპოზიციონერმა დეპუტატებმა თავმჯდომარეს ჰკითხეს, როგორი იყო კვაჭანტირაძის მუშაობა კომიტეტში, რაზეც მან უპასუხა, რომ ის წარმატებული არ ყოფილა. მისივე თქმით, ამას მის გადაყენებასთან კავშირი არ აქვს.