პარლამენტის თავმჯდომარემ, ირაკლი კობახიძე განაცხადა, რომ დიასპორისა და კავკასიის საკითხთა კომიტეტი ზვიად კვაჭანტირაძის თავმჯდომარეობით წარმატებული არ იყო.

დღეს, 19 მარტს პლენარულ სხდომაზე კომიტეტის თავმჯდომარეობიდან ზვიად კვაჭანტირაძის მოხსნას განიხილავენ. როგორც კობახიძემ განაცხადა, კვაჭანტირაძის მოხსნის გადაწყვეტილება ქართული ოცნების 18 მარტის სხდომაზე მას შემდეგ მიიღეს, რაც კვაჭანტირაძემ უმრავლესობა დატოვა. კვანაჭანტირაძის ადგილას უმრავლესობა ბექა ოდიშარიას განიხილავს.

ოპოზიციონერმა დეპუტატებმა თავმჯდომარეს ჰკითხეს, როგორი იყო კვაჭანტირაძის მუშაობა კომიტეტში, რაზეც მან უპასუხა, რომ ის წარმატებული არ ყოფილა. მისივე თქმით, ამას მის გადაყენებასთან კავშირი არ აქვს. კობახიძის სიტყვებს დარბაზიდან ხმაური მოყვა.

"წარმატებული იყო, ბატონო ზვიად, თქვენი კომიტეტი? ჩახედეთ თქვენს ანგარიშს, ამაზე არ შეიძლება საუბარი. თუ რომელიმე კოლეგა აქ წარმატებულად მიიჩნევს ამ კომიტეტის საქმიანობას, ნუ, მე არ ვიცი", — აღნიშნა კობახიძემ.

მისივე თქმით, დიასპორა პარლამენტში ერთ-ერთი ჩავარდნილი მიმართულება იყო და მათი გადაწყვეტილების საფუძველი ესეც არის, რომ ეს მიმართულება უფრო მეტად გაძლიერდეს. გარდა ამისა, კობახიძემ აღნიშნა, რომ კვაჭანტირაძის გადაყენება პოლიტიკური გადაწყვეტილებაა.