საქართველოს საპატრიარქო "ფსევდორელიგიურს" ეძახის რიგ რელიგიურ ორგანიზაციებს და მიაჩნია, რომ მათი სასულიერო პირები სავალდებულო ჯარიდან არ უნდა გათავისუფლდნენ. ამ შინაარსის განცხადება საპატრიარქომ გაავრცელა.

"სასულიერო პირების სავალდებულო სამხედრო სამსახურიდან განთავისუფლება საყოველთაოდ მიღებული პრაქტიკაა და ჩვენ მას მხარს ვუჭერთ. სახელმწიფოში ასევე გარანტირებული უნდა იყოს არასამხედრო ალტერნატიული შრომითი სამსახური.

ამასთან უნდა გატარდეს შესაბამისი ზომები, რათა ეს პრაქტიკა არ იქნას გამოყენებული ფსევდორელიგიური იურიდიული პირების მიერ თავიანთი ვიწრო მერკანტილური ინტერესებისათვის, რაც რელიგიურობით მანიპულაციას და აშკარა ანტისახელმწიფოებრივ ქმედებას წარმოადგენს", — აღნიშნულია საპატრიარქოს განცხადებაში.

საპატრიარქოს განცხადება დროში ემთხვევა თავდაცვის კომიტეტის თავმჯდომარის, ირაკლი სესიაშვილის მიერ გაჟღერებულ ინიციატივას, რომლის მიხედვითაც, ყველა მღვდელმსახურს ჯარში წასვლა მოუწევს. გამონაკლისი იქნებიან მართლმადიდებელი სასულიერო პირები.