ადამიანები, რომლებიც ღამის 1-2 საათამდე ვერაფრით იძინებენ, საზოგადოების არც თუ მცირე ნაწილს წარმოადგენენ, თუმცა მათ გრაფიკზე თითქმის არაფერია მორგებული: სკოლები, უნივერსიტეტები და სამსახურები დილაადრიან იწყება, ობიექტების უმრავლესობა კი საღამოს 11-სკენ იკეტება. მიუხედავად იმისა, რომ ამ კუთხით საზოგადოება ბევრს ვერაფერს შეცვლის, ერთი რამის გამოსწორება ნამდვილად შეიძლება, კერძოდ კი, ღამის ტელევიზიის.

25 მარტიდან რუსთავი 2-ის ღამის ეთერში ახალი გადაცემა, სხვა შუაღამე იწყება, რომელსაც 12 განსხვავებული წამყანი ეყოლება. მათ შორის არიან მუსიკოსები, ჟურნალისტები, აქტივისტები, მსახიობები... - მოკლედ რომ ვთქვათ, წამყვანებიც იმდენადვე მრავალფეროვნები არიან, რამდენადაც - მათი მაყურებლები.

გადაცემის წამყვანები ყოველდღიურად გამოეხმაურებიან საქართველოში და მსოფლიოში მიმდინარე აქტუალურ თემებს, თუმცა საზოგადოებრივი და პოლიტიკური საკითხების სუბიექტური ანალიზის გარდა, საინტერესო ამბებს სხვა სფეროების შესახებაც ნახავთ. სხვა შუაღამის ეთერში დიდი დრო დაეთმობა თანამედროვე ქართულ მუსიკასაც.

სხვა შუაღამის ფორმატი სრულიად უნიკალურია: კვირაში ექვსჯერ, ღამის 12-დან 2-საათამდე ოთხი წამყვანი პირდაპირ ეთერში იმუშავებს იმაზე, რომ ფხიზელი საათები საინტერესოდ და სასარგებლოდ გაატაროთ.

ორშაბათს და სამშაბათს გადაცემის წამყვანები ნინო დარასელი, სანდრო კაკულია, სალომე დადუნაშვილი და ნოდარიკო ხუციშვილი იქნებიან [პირველი ოთხეული]

ოთხშაბათს და ხუთშაბათს ღამის განწყობაზე ლელა წურწუმია, ნანკა კალატოზიშვილი, აჩიკო სოლოღაშვილი და ნიკა ლომიძე იზრუნებენ [მეორე ოთხეული]

პარასკევს და შაბათს კი, კვირის ბოლოს მაკო კვიტაიშვილი, ანა სუბელიანი, ლაშა ნაკაიძე და შოთა დიმიტრიშვილი შემოგვთავაზებენ საინტერესო თემებს [მესამე ოთხეული]

გადაცემის დაწყებამდე ცოტა დრო რჩება.