სასოწარკვეთილი დიასახლისების ვარსკვლავი, ფელისიტი ჰოფმენი სასამართლო დარბაზიდან გირაოს გადახდის შემდეგ გაათავისეუფლეს.

56 წლის მსახიობს რამდენიმე საათის წინ ბრალი პრესტიჟული სასწავლებლების თანამშრომლების მოსყიდვის საქმეში წაუყენეს.

ფელისიტიმ გირაოს სახით, საპატიმროს დასატოვებლად $250 ათასი გადაიხადა და მომდევნო სასამართლო სხდომამდე გათავისუფლდა.

დარბაზის დატოვებისას გადაღებულ ფოტოებში ჩანს, რომ სასოწარკვეთილი დიასახლისების ვარსკვლავი ემოციებს ვერ იკავებდა:

სასოწარკვეთილი დიასახლისების ვარსკვლავი მასაჩუსეტსის პროკურატურამ 50 ადამიანთან ერთად დააპატიმრა და ბრალი პრესტიჟული სასწავლებლების თანამშრომლების მოსყიდვის საქმეში წაუყენა.

ჰოფმენი და სხვა ბრალდებულები რეიტინგული სკოლებისა და კოლეჯის თანამშრომლებს ქრთამის სახით რამდენიმე ათასს უხდიდნენ, საბოლოოდ ისინი ტესტირებას მარტივად გადიოდნენ და ჩარიცხვის დასტურიც მოსდიოდათ.

საქმეში ფიგურირებენ იელის, სტენფორდის, ჯორჯთაუნისა და სხვა რეიტინგული უნივერსიტეტების ის თანამშრომლები, რომლებიც პასუხისმგებელნი არიან ტესტირების შედეგებზე.

პროკურატურის ცნობით, სქემა 2011 წლიდან მუშაობდა და მასში ცნობილი მსახიობები, დიზაინერები, ბიზნესმენები და სხვა გავლენიანი პირების ბრალეულობა იკვეთება. რაც შეეხება ფელისიტის, გამოძიების ინფორმაციით, მან საწყის ეტაპზე $15 ათასი გადაიხადა იმისთვის, რომ მისი შვილი ერთ-ერთ კოლეჯში ჩაერიცხათ.

მათივე თქმით, სქემა კი ასე მოქმედებდა - ჰოფმანი არარსებული საქველმოქმედო ორგანიზაციის ანგარიშზე იმ თანხას რიცხავდა, რომელსაც ეუბნებოდნენ, საბოლოოდ კი მისი უფროსი შვილი გამოცდებს გამარტივებული წესით ჩააბარებდა.

როგორც FBI-ის აგენტი, ჯოზეფ ბონავოლონტა ამბობს, მშობლები $200 ათასიდან $6,5 მილიონამდე ხარჯავდნენ იმისთვის, რომ სასურველი შედეგი მიეღოთ.