აშშ-ს კონგრესის წარმომადგენლობითმა პალატამ ოთხი დოკუმენტი მიიღო, რომელიც კრემლისა და პრეზიდენტი ვლადიმეტ პუტინის აგრესიული პოლიტიკის წინააღმდეგაა მიმართული.

კონგრესმენებმა მიიღეს რეზოლუცია, რომლითაც ოპოზიციონერი ბორის ნემცოვის მკვლელობაზე პასუხისმგებლობა პუტინის რეჟიმს ეკისრება. ისინი მოითხოვენ, რომ საქმეზე საერთაშორისო გამოძიება ჩატარდეს და მკვლელობის დამკვეთები დაისაჯონ.

ამასთანავე, ერთ-ერთი დოკუმენტით, აშშ-ს ხელისუფლებასა და ფედერალურ ორგანოებს ეკრძალებათ, ყირიმი რუსეთის ტერიტორიად იურიდიულად ან ფაქტობრივად ოდესმე აღიარონ.

კიდევ ერთი დოკუმენტი მოითხოვს ეროვნული დაზვერვის დირექტორისგან, რომ ექვს თვეში ვლადიმერ პუტინის აქტივებთან დაკავშირებით ანგარიში მოამზადოს. ამასთანავე, დაზვერვის ხელმძღვანელს დაევალა 90 დღეში მოამზადოს ანგარიში ნატოს წევრი ქვეყნების წინააღმდეგ რუსეთის მხრიდან სავარაუდო სამხედრო მოქმედებების შესახებ და რუსეთის მცდელობებზე "გამოიყენოს სისუსტე და უთანხმოება მის დასავლელ ოპონენტებს შორის".