აპრილში წლიური ინფლაციის დონემ 3,2% შეადგინა

სტატისტიკის ეროვნული სამსახურის ინფორმაციით, 2016 წლის აპრილში საქართველოში ინფლაციის დონემ წინა თვესთან შედარებით -0,6%, ხოლო წინა წლის შესაბამის თვესთან შედარებით 3,2% შეადგინა. 2010 წლის საშუალოსთან შედარებით სამომხმარებლო ფასების ინდექსი 17,0 პროცენტით გაიზარდა.

საქსტატის ცნობით, 2016 წლის აპრილში ინფლაციის მაჩვენებლის ფორმირებაზე ძირითადი გავლენა ფასების ცვლილებამ შემდეგ ჯგუფებზე იქონია:

სურსათი და უალკოჰოლო სასმელები: ფასები 0,7%-ით შემცირდა, რაც
ინფლაციის მთლიან მაჩვენებელზე -0,23%-ით აისახა. აღნიშნული კლება
უმეტესწილად განაპირობა ფასების შემცირებამ შემდეგ ქვეჯგუფებზე: რძე, ყველი და კვერცხი (-6,0%) და ბოსტნეული და ბაღჩეული (-2,2%).
ჯანდაცვა: ფასები 1,9%-ით შემცირდა, რაც ინფლაციის მთლიან მაჩვენებელზე -0,19%-ით აისახა. ფასები მნიშვნელოვნად შემცირდა სამედიცინო პროდუქციის, აპარატურისა და მოწყობილობების ქვეჯგუფზე (-7,2%).
ალკოჰოლური სასმელი და თამბაქო: ფასები 1,6%-ით გაიზარდა, რამაც თვიური ინფლაციის მთლიან მაჩვენებელზე 0,10%-ით იქონია გავლენა. ფასები ძირითადად გაიზარდა თამბაქოს ნაწარმზე (2,5%).

რაც შეეხება სამომხმარებლო კალათაში შემავალი საქონლისა და მომსახურებების ჯგუფების ფასების პროცენტულ ცვლილებასა და შესაბამის წვლილს 2016 წლის აპრილის წლიური ინფლაციის მაჩვენებელში, აქ მონაცემები ასე გადანაწილდა:

ალკოჰოლური სასმელები და თამბაქო: ფასები 14,7%-ით გაიზარდა, რაც ინფლაციის მთლიან მაჩვენებელზე 0,89%-ით აისახა. ფასები ძირითადად თამბაქოს ნაწარმის ქვეჯგუფზე გაიზარდა(22,6%).
ჯანდაცვა: ფასები გაიზარდა 7,5%-ით, რაც ინფლაციის მთლიან მაჩვენებელზე 0,72%-ით აისახა. ფასები ძირითადად მომატებულია სამედიცინო პროდუქციის, აპარატურისა და მოწყობილობების (10,2%) და ამბულატორიული სამედიცინო მომსახურების (10,3%) ქვეჯგუფებზე.
სურსათი და უალკოჰოლო სასმელები: 12-თვიან პერიოდში ფასები გაიზარდა 1,9%-ით და ჯგუფის წვლილმა წლიური ინფლაციის მთლიან მაჩვენებელში 0,58% შეადგინა. ფასები გაიზარდა შემდეგ ქვეჯგუფებზე: ხილი და ყურძენი (14,9%), ზეთი და ცხიმი (7,8%). ფასების შემცირება დაფიქსირდა ბოსტნეულსა და ბაღჩეულზე (-9,3%).
ტრანსპორტი: აქ ფასები 6,1 %-ით შემცირდა, რაც -0,75%-ით აისახა წლიური ინფლაციის მთლიან მაჩვენებელში. ჯგუფში ფასები გაიზარდა სატრანსპორტო მომსახურებაზე (1,4%).