სამხედრო მოსამსახურე, ქაზიმ გახრამანოვი ამტკიცებს, რომ მეთაურის თანდასწრებით ფული მოსთხოვეს, უარის შემდეგ კი სცემეს. ამის შესახებ ინფორმაცია რუსთავი 2-მა გაავრცელა.

წვევამდელი აცხადებს, რომ ცემის შემდეგ ექიმთან მივიდა, თუმცა არავინ ჰკითხა, რატომ ჰქონდა თვალი ჩალურჯებული. ტელეკომპანიის ცნობით, მან მშობლებთან დაკავშირება შეძლო და კრწანისის სასწავლო ცენტრიდან სახლში გადაიყვანეს.

"პარასკევს [2019 წლის 8 მარტს], ღამის ორ საათზე დაგვიძახეს და ფული მოგვთხოვეს, ეს ყველაფერი სერჟანტ უნდილაძის თვალწინ ხდებოდა. ფულის მიცემაზე უარი ვთქვი და სასტიკად გამისწორდნენ, მცემეს. მეორე დღეს ექიმთან მივედი და არც კი უკითხავს თვალი რატომ მქონდა ჩალურჯებული", — ამბობს წვევამდელი.

თავდაცვის სამინისტროში On.ge-ს დაუდასტურეს, რომ ქაზიმ გახრამანოვი წვევამდელია. უწყებაში თქვეს, რომ მომხდართან დაკავშირებით კომენტარი კრწანისის სამხედრო ბაზაზე გაკეთდება.