დიდი ბრიტანეთიდან ე.წ. ისლამურ სახელმწიფოში გაქცეული შამიმა ბეგუნის ახალშობილი ბავშვი გარდაიცვალა. როგორც BBC წერს, ორი კვირის წინ დაბადებულ ბავშვს სუნთქვის პრობლემები ჰქონდა, რაც, სავარაუდოდ, ფილტვების ინფექციით იყო გამოწვეული. ბავშვი რამდენიმე დღის წინ საავადმყოფოში მოათავსეს, თუმცა მისი გადარჩენა ვერ მოხერხდა.

შამიმა ბეგუმი 15 წლის ასაკში თავის ორ მეგობართა ერთად ლონდონიდან სირიაში გაემგზავრა და ე.წ. ისლამურ სახელმწიფოს შეუერთდა. იქ ის გათხოვდა ჯიჰადისტზე, რომელიც სირიაში ნიდერლანდებიდან ჩავიდა.

ბეგუმის ისტორიაზე საუბარი რამდენიმე კვირის წინ დაიწყეს, როდესაც Times-ის ჟურნალისტმა ის ლტოლვილთა ბანაკში იპოვა და მასთან ინტერვიუ ჩაწერა. ინტერვიუს დროს მან განაცხადა, რომ ორსულადაა და ლონდონში დაბრუნება სურდა.

ამის შემდეგ ბეგუმმა BBC-სთან საუბრისას იმედი გამოთქვა, რომ დიდი ბრიტანეთის ხელისუფლება მას აპატიებდა და სახლში დაბრუნების საშუალებას მისცემდა. ბრიტანეთის ხელისუფლება კი მის დაბრუნებაზე უარს ამბობს.

ბეგუმის ოჯახი ამბობს, რომ შინაგან საქმეთა სამინისტრომ გოგოს მოქალაქეობა ჩამოართვა. კანონით, შინაგან საქმეთა მინისტრს უფლება აქვს მსგავსი გადაწყვეტილება მიიღოს, თუმცა იმ პირობით, თუ მოქალაქეობა ჩამორთმეული არ დარჩება მოქალაქეობის არმქონე პირად. ბრიტანეთის შს-ში აცხადებენ, რომ ბეგუმ ბანგლადეშში ცხოვრების უფლება აქვს, რადგან დედამისი ამ ქვეყნის მოქალაქეა. ამავე დროს, ბანგლადეში უარს ამბობს შამიმა ბეგუმის შეფარებაზე.