ფინანსთა სამინისტროს საგამოძიებო სამსახურმა ყალბი ფულის გასაღების ორ საქმეზე სამი პირი დააკავა. მათივე განცხადებით, დაკავებულებისაგან 4 150 ლარის ოდენობის სხვადასხვა ნომინალის ყალბი კუპიურა ამოიღეს.

გამოძიების ინფორმაციით, ერთ საქმეში ბრალდებულმა კახეთში 200 ლარის ყალბი კუპიურა გაასაღეს. რაც შეეხება მეორე საქმეს, გამოძიება ამბობს, რომ ბრალდებულებმა თბილისისა და შიდა ქართლის სავაჭრო ობიექტებში 100 და 200-ლარიანი ყალბი კუპიურები გაასაღეს.

გამოძიება მიმდინარეობს საქართველოს სისხლის სამართლის კოდექსის 212-ე მუხლის პირველი ნაწილით, რაც ყალბი ფულის ან ფასიანი ქაღალდის დამზადებას ან გასაღებას გულისხმობს. დანაშაული სასჯელის სახით ითვალისწინებს თავისუფლების აღკვეთას 4-დან 7 წლამდე ვადით.