21 წლის ასაკში კაილი ჯენერი ოფიციალურად გახდა ისტორიაში ყველაზე ახალგაზრდა მილიარდერი, რომელმაც ფული დამოუკიდებლად იშოვა. ტიტულის წინა მფლობელი, მარკ ცუკერბერგი მილიარდერების სიას 23 წლის ასაკში შეუერთდა.

ფორბსმა გასულ წელს განაცხადა, რომ კაილი ჯენერი მალე მილიარდერი გახდებოდა, ცოტა ხნის წინ კი კარდაშიანების ოჯახის უმცროსმა წევრმა კოსმეტიკური მაღაზიების ქსელ Ultas-სთან ექსკლუზიური ხელშეკრულება დადო, რის შედეგადაც მისი ბიზნესის შემოსავალი 9%-ით გაიზარდა.

Kylie Cosmetics, რომელიც 2015 წელს შეიქმნა, ამჟამად $900 მილიონი ღირს. კაილი თავის წარმატებას სოციალური მედიის ძალით ხსნის და ამბობს, რომ მიუხედავად იმისა, რომ ამ ტიტულის მიღწევა მიზნად არასდროს დაუსახავს, აღიარება მაინც სასიამოვნოა.

ინტერნეტ-მომხმარებლებში ამ ფაქტმა გარკვეული კითხვებიც გააჩინა იმასთან დაკავშირებით, არის თუ არა კაილი მართლაც დამოუკიდებლად გამდიდრებული ბიზნესმენი.

ახალგაზრდა მილიარდერმა აღნიშნა, რომ მას ნამდვილად ჰქონდა დიდი პლატფორმა, თუმცა მემკვიდრეობით არაფერი მიუღია და 15 წლიდან თავად ზრუნავს კომპანიის განვითარებაზე.