Game of Thrones-ის მაყურებელი ზამთრის დადგომაზე არანაკლებ დიდი შემართებით ფინალური სეზონის ტრეილერის გამოსვლას ელოდა. ეს დღეც დადგა.

Trailer is here — ამ წარწერით სერიალის ოფიციალურ გვერდზე ვიდეო გამოქვეყნდა და ლოდინის რეჟიმიც ჩაირთო.

რამდენიმე წუთში კი ტრეილერის სრული ვერსია სერიალის Youtube არხზე განთავსდა.

ტრეილერს პირველივე წამებიდანვე შემოაქვს დაძაბულობა. შეშინებული და დასისხლიანებული არია სტარკის ხილვის შემდეგ რთული მისახვედრი არ არის, რომ თეთრი მოარულები უკვე ვინტერფელში არიან.

"მე ვიცნობ სიკვდილს. მას ბევრი სახე აქვს", — ისმის არიას ხმა, რომელიც ობსიდიანის დანით შეიარაღებული გარბის.

ფოტო: კადრი ვიდეოდან / Game Of Thrones

"ყველაფერმა, რასაც თქვენ აკეთებდით, აქამდე მოგიყვანათ. იქ, სადაც თქვენი ადგილია", — ამ სიტყვებს ბრანდონ სტარკი სემუელ ტარლის ეუბნება. კადრში კი პარალელურად ვხედავთ ეურონ გრეიჯოის ფლოტს, უფრო ზუსტად კი გემებს, რომელზეც სავარაუდოდ ლანისტერების არმიაა და მას ჯეიმი ლანისტერი უძღვება.

ფოტო: კადრი ვიდეოდან / Game Of Thrones

მომდევნო კადრში კი, ტრადიციულად, ბოროტი ღიმილით სახედამშვენებულ სერსეი ლანისტერს ვხედავთ. მის ერთგულ მრჩეველს კი შეშფოთებული სახე აქვს.

ფოტო: კადრი ვიდეოდან / Game Of Thrones

ტრეილერი გვამცნობს, რომ ვინტერფელში დეინერის ტარგარიანი და აწ უკვე მისი მორჩილი ჩრდილოეთის მეფე ბრუნდებიან.

ფოტო: კადრი ვიდეოდან / Game Of Thrones

რაღა თქმა უნდა, აქვე არიან დროგონი და რეიგარიც.

ფოტო: კადრი ვიდეოდან / Game Of Thrones

მომდევნო კადრში სტარკების აკლდამაში განმარტოებულ ჯონს ვხედავთ, რომელსაც დეინერისი უახლოვდება.

ფოტო: კადრი ვიდეოდან / Game Of Thrones

"ისინი მოდიან. ჩვენი მტერი არ იღლება, არ ჩერდება, ვერ გრძნობს", — ამბობს ჩრილოეთის მეფე და კადრში საომარ მზადებას და ვინტერფელში მყოფების შიშს ვხედავთ.

აქვეა ჯეიმი ლანისტერიც, რომელმაც სიტყვას არ უღალატა და ვინტერფელში დეინერისისა და ჯონის დასახმარებლად ჩავიდა.

ფოტო: კადრი ვიდეოდან / Game Of Thrones

და მაშინ, როცა ვინტერფელი გადარჩენისთვის იბრძვის, სერსეი ლანისტერი ისევ და ისევ, ტრადიციულად, ღვინოს მიირთმევს. მართალია, თვალცრემლიანია, მაგრამ სისუსტის არაფერი ეტყობა.

ფოტო: კადრი ვიდეოდან / Game Of Thrones

მომდევნო კადრებში ყველაფერი თავდაყირა დგება. დრაკონები, არია, სანსა, ტირიონი, ჯორაჰი და...

ზამთარიც დადგა. ღამის მეფე ვინტერფელთან მივიდა.

ტრეილერმა მაყურებელს გაურკვევლობა და უამრავი უპასუხო კითხვა დაუტოვა. შეიძლება ითქვას, რომ მოლოდინები არ გამართლდა და რეალურად ახალი ვერაფერი გავიგეთ იმის გარდა, რომ ვინტერფელში ომისთვის ემზადებიან. ეს კი წინა სეზონშიც ვიცოდით.

შეგიძლიათ თავად ნახოთ, შეაფასოთ და თეორიები გაგვიზიაროთ.